COVID-19 yishe umusirikare w’u Rwanda wari mu butumwa bwa UN
BBC yahawe amakuru ko uwapfuye yari amaze iminsi agaruwe mu Rwanda kubera uburwayi, akaba yari mu ngabo ziri i Juba mu butumwa bw’amahoro bw’ingabo z’umuryango w’abibumbye buzwi nka UNMISS muri Sudani y’Epfo.
Abandi Banyarwanda babiri bishwe na Covid-19 mu gihe gishize, ni umushoferi w’amakamyo w’imyaka 65, n’umupolisikazi w’imyaka 24 nawe wari mu butumwa bwa UNMISS i Makakal muri Sudani y’Epfo.
Muri Sudani y’Epfo ubu hamaze kuboneka abantu 2,021 banduye Covid-19 muri bo 38 yarabishe naho 333 ni bo bamaze kuyikira nk’uko bivugwa na Kaminuza y’ubushakashatsi ya Johns Hopkins.
Minisiteri y’ubuzima ivuga ko abantu bashya 17 banduye babonetse ejo ku wa gatatu mu bipimo 3,961 byafashwe. Abamaze kwandura bose hamwe ni 1,042, abakize ni 480.
Kuva uyu munsi ku wa kane, ikigo gishinzwe ubuzima mu Rwanda kivuga ko hatangira gupimwa abantu ku mihanda imwe n’imwe yatoranyijwe mu mujyi wa Kigali.
Iki kigo kivuga ko kigamije gusesengura uko iki cyorezo gihagaze mu mujyi wa Kigali.
UN ivuga ko kugeza mu kwezi kwa gatatu UNMISS yari igizwe n’abantu (abasirikare, abapolisi n’abakozi b’abasivili) barenga 16,000.
U Rwanda ni cyo gihugu gifiteyo abasirikare (barenga 2,700) n’abapolisi benshi (barenga 500).
BBC