Hagaragajwe uburyo Perezida w’Uburusiya Vladimir Putin yihishe inyuma y’ubujura bw’amakuru ku rukingo rwa Coronavirus
Abashakashatsi bo mu Bwongereza bamaze igihe bashakisha urukingo rwa Covid-19, bavuga ko kuva muri Werurwe 2020 bagabwaho ibitero n’abajura bo mu Burusiya.
Iperereza ryakozwe rigaragaza ko itsinda ry’abajura mu by’ikoranabuhanga (hackers) ryitwa ’APT29’, ’The Dukes’ cyangwa se ’Cozy Bear’ ryabayeho kuva mu 2008 ari ryo riri kwibasira ubu bushakashatsi. Iri tsinda ngo rikorana bya hafi n’Urwego rw’Iperereza rw’u Burusiya.
Aba bajura kandi ni bwo bakekwaho kwivanga mu matora ya Perezida wa Leta Zunze Ubumwe z’Amerika yabaye mu 2016, igikorwa cyazamuye umwuka mubi hagati y’iki gihugu n’u Burusiya.
Iri perereza ryemeje ko Perezida Putin azi neza iby’ibi bitero itsinda rya Cozy Bear riri kugaba ku bahanga mu by’ubumenyi bw’inkingo bari gushaka urukingo rwa Covid-19.
Ibiro bya Minisitiri w’Intebe bikimara kumenya ibyavuye muri iri perereza, byatangaje ko “byamaganye ugererageza kwiba amakuru y’abashakashatsi ku rukingo rwabafasha guhangana na Covid-19.”
U Bwongereza ni kimwe mu bihugu bikataje mu gushakisha urukingo rwa Covid-19 cyifashishije abahanga biganjemo abo muri kaminuza ya Oxford na Imperial University of London. Ubu bushakatsi buyobowe na Prof. Sarah Gilbert; mwarimu akaba n’umushakashatsi muri Kaminuza ya Oxford.
Amakuru kuri ubu bushakashatsi arinzwe mu buryo bukomeye kugira ngo hatagira uwayiba. Kuva bwatangira, abajura benshi bagerageze kwinjirira aba bahanga mu buryo bw’ikoranabuhanga ariko ntabwo babishoboye nk’uko inkuru ya The Sun ibivuga.
Kua icyorezo cya Covid-19 cyatangarira kwibasira Isi mu mpera za 2019, kimaze gufata abantu miliyoni 13.7, abo kimaze kwica barenga ibihumbi 588, abakize bo barenga miliyoni 8.1.