Sudani yataye muri yombi abaturage bayo 160 bari bagiye kuba abacancuro mu ntambara yo muri Libya
Jenerali Mohamed Hamdan Dagalo, uyoboye igisirikare cya Sudani cyo muri iki gihe cy’inzibacyuho yavuze ko badashobora kwemera ko hari abacancuro b’abanya Sudani bajya kurwana muri Libiya.
Mu kwezi kwa mbere,ikipe y’abahanga ba ONU yavuze ko hari abarabu benshi bo muri Sudani mu ntara ya Darfur n’abo mu gihugu cya Chadi barimo bararwana nk’abacancuro muri Libiya.
Mu kwezi gushize, Sudani yafashe abandi bantu 122 barimo abana umunani muri Darfur y’uburengerazuba bari mu myiteguro yo kujya kurwana nk’abacancuro mu ntambara muri Libiya.
Intagondwa ziyobowe na Gen. Khalifa Haftar zikomeje guhangana n’ingabo ziri ku ruhande rwa Minisitiri w’Intebe wa Libya, Fayez al-Serraj ushigikiwe na UN,aho abantu benshi bamaze kwicirwa muri iyi mirwano.
Minisitiri w’Intebe wa Libya, Fayez al-Serraj ashinja uyu Gen Khalifa Haftar wahoze ayoboye ingabo za Libya,LNA, gushaka gufata ubutegetsi ku ngufu.
Inyeshamba ziyobowe na Jenerali Khalifa Haftar zimaze igihe ziri mu ntambara na Leta mu mugambi wo kwigarurira umurwa mukuru Tripoli.
Kuva aho umukuru w’igihugu cya Libya, Muammar Gaddafi, akuriwe ku butegetsi akanicwa n’abarwanyi bari bashyigikiwe n’ingabo z’umuryango wa OTAN,Libya ntirigera ibona amahoro.
Iki gihugu gifite leta 2 ziri mu bushyamirane, imwe iri mu murwa mukuru Tripoli isanzwe ishyigikiwe na ONU, iyindi iyobowe na Jenerali Khalifa Haftar ifite ikicaro mu mujyi wa Tobruk uri mu majyepfo ya Libya
Ingabo za Jen. Haftar zatangiye urugamba rwo kwigarurira umurwa mukuru Tripoli mu kwezi kwa kane umwaka ushize wa 2019.