Print

Polisi y’u Rwanda yerekanye abantu ibihumbi 2,046 bafashwe barenze ku mabwiriza yo kwirinda Covid-19 mu gihugu hose

Yanditwe na: Dusingizimana Remy 1 August 2020 Yasuwe: 2371

Nubwo ibikorwa bitandukanye byasubukuwe nyuma y’igihe hari guma mu rugo,hari abantu bamwe na bamwe banze kumvira amabwiriza yashyizweho yo kwirinda ko icyorezo cya Covid-19 cyakwirakwira bigashyira igihugu mu kaga.

Mu gitondo,Polisi y’u Rwanda ikorera mu karere ka Gasabo yerekanye abantu 242 bafashwe barenze ku mabwiriza yo kwirinda iki cyorezo barajwe muri stade Amahoro.

Ubuyobozi bw’aka karere buravuga ko kuba hafashwe abantu bangana gutya bigaragaza ko abaturage batarumva ubukana bw’icyorezo cya Covid-19.

Mu karere ka Nyanza hafashwe abantu 117 barenze ku mabwiriza yo Kwirinda icyorezo cya Covid19 arimo kutambara agapfukamunwa, kudashyiramo intera ya metero, no kurenza saa tatu bakiri mu rugendo n’ibindi.

Ubuyobozi bw’akarere bufatanyije na Polisi y’u Rwanda ikorera muri ako karere babasabye kwirinda ‘kutubahiriza amabwiriza’ kuko iki cyorezo gihangayikishije isi yose.

Police y’u Rwanda kandi yerekanye abantu 109 barenze ku mabwiriza yo kwirinda Covid-19 mu karere ka kicukiro.

Ubuyobozi bw’akarere ka kicukiro nabwo burasaba buri wese kugira uruhare mu kwirinda gukwirakwiza icyorezo cya Covid-19 hubahirizwa amabwiriza yashyizweho, ndetse n’inzego z’ibanze zigakomeza gukurikirana uko ashyirwa mu bikorwa

Mu karere ka Nyarugenge abafashwe bagera ku 471bituma ubuyobozi bw’akarere busaba abafashwe gutahiriza umugozi umwe mu kurwanya icyorezo cya #COVID19 ndetse bakanubaha ubuyobozi.