Umusaza w’imyaka 77 yabaye umuntu wa 7 wahitanwe na Coronavirus mu Rwanda
Kuri iki cyumweru tariki ya 09 Kanama 2020,iki cyorezo cyahitanye umubyeyi w’imyaka 77 uje akurikira undi mugabo w’imyaka 55 wapfuye ku munsi w’ejo.
Abanduye bashya uyu munsi ni 6 barimo ababonetse I Kigali 5 n’umuntu umwe wo mu karere ka Rusizi:
Abamaze kwandura iki cyorezo bose mu Rwanda ni 2,140. Uyu munsi hakize abantu 46. bituma umubare w’abamaze gukira covid-19 baba 1,346. Abakirwaye ni 787. Abamaze gupfa bose babaye 7.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Mu gukomeza kwirinda ikwirakwira rya Coronavirus, abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.
Minisiteri y’Ubuzima muri Kenya yatangaje ko abantu 1062 bakize Coronavirus mu munsi umwe, mu gihe babiri ari bo bahitanywe n’iki cyorezo mu masaha 24 ashize.
Umubare mushya w’abakize uburwayi bagasezererwa mu bitaro, ni wo munini w’abakize mu munsi umwe muri Kenya.
Mu mibare yatangajwe kuri iki Cyumweru, abantu 599 bashya basanzwemo iki cyorezo, bituma abamaze kwandura muri rusange baba 26,436.
Ubwandu bushya bwemejwe uyu munsi bwabonetse mu bipimo 4420 byafashwe. Mu banduye bagaragaye harimo Abanyakenya 593 n’abanyamahanga batandatu.
Nyuma y’abantu babiri byemejwe ko bishwe na COVID-19, umubare w’abamaze kwicwa n’iki cyorezo wahise ugera kuri 420.
Imibare itangazwa n’Ishami ry’Umuryango w’Abibumbye ryita ku Buzima, OMS, igaragaza ko abantu 19.811.134 aribo bamaze kwandura Coronavirus ku Isi, mu gihe abamaze gupfa bo ari 729.653.
U Buhinde ni cyo gihugu cyagize ubwandu bwinshi mu masaha 24 ashize kuko biyongereyeho 4149 bigatuma umubare w’abamaze kwandura uba 2.156.169 naho abamaze gupfa ni 43.484.
Ibindi bihugu bifite ubwandu bwinshi ni Leta Zunze Ubumwe za Amerika ifite ubwandu 5.149.723 n’abantu 165.070 bapfuye mu gihe Brésil ifite abantu 3.013.369 banduye na 100.543 bapfuye.
U Burusiya bufite ubwandu 882.347 mu gihe abantu bamaze gupfa bo ari 14.854. Afurika y’Epfo ubu irabarura abantu 553.188 banduye na 10.210 bapfuye.
Mu bihugu 10 bifite ubwandu bwinshi ku Isi, harimo bitanu byo muri Amerika y’Amajyepfo, bibiri byo mu Burayi, kimwe cyo muri Aziya, kimwe cyo muri Amerika ya Ruguru na kimwe cyo muri Afurika.
Ku mugabane wa Afurika usibye Afurika y’Epfo, ibindi bihugu byibasiwe cyane ni Misiri ifite ubwandu 95.314 n’impfu 4.992, Nigeria ifite ubwandu 46.140 n’impfu 942, Ghana ifite ubwandu 40.533 n’impfu 206 na Algerie ifite ubwandu 34.693 n’impfu 1.293.
