Umutoza mukuru w’ikipe ya FC Barcelone yahambirijwe utwe nyuma yo kwandagazwa na Bayern Munich
Ibyo bitego birimo bibiri bya Thomas Mürrer, bibiri bya Philippe Coutinho, icya Ivan Perisic, Serge Gnabry, Joshua Kimmich na Robert Lewandowski.
Ibitego bya FC Barcelona byatsinzwe na David Alaba na Luis Suarez.
FC Barcelona yanditse amateka mabi yo kuba yaherukaga gutsindwa ibitego umunani mu mukino umwe mu 1946, ubwo yabitsindwaga na Sevilla muri Copa del Ley.
Inkuru y’uko ikipe ya FC Barcelona yamaze gutandukana n’umutoza Quique Sétien, yazanwe bwa mbere n’umunyamakuru Fabrizio Romano wa Sky Italia. Yagize ati:
Barcelona yamaze gufata icyemezo cyo kwirukana Quique Setién, nyuma yo gutsindwa nabi cyane na Bayern Munich. Ntabwo azaba ari umutoza mu mwaka w’imikino utaha.
FC Barcelona ntabwo iremeza niba koko yamaze kwirunana uriya mukambwe, gusa Perezida w’iyo kipe, Josep Maria Bartomeu aganira na Movi Star yavuze ko hari impinduka zikomeye zigiye kuba.
Myugariro Gerard Pique na we aganira na kiriya gitangazamakuru, yemeje ko FC Barcelona ikeneye impinduka zitari ku mutoza gusa, ngo kuko ibyababayeho bitari ugutsindwa gusa ko ahubwo ari ’igisebo’.
Mu bahabwa amahirwe yo gusimbura Quique Setien harimo Umunya-Argentine, Mauricio Pochettino wahoze atoza Tottenham yo mu Bwongereza, cyo kimwe n’Umunya-Espagne, Xavi Hérnandez wakiniye FC Barcelona igihe kirekire.
Quique Sétien yari umutoza wa FC Barcelona kuva muri Mutarama uyu mwaka, nyuma yo kuyigeramo asimbuye umutoza Ernesto Valverde wari umaze kwirukanwa.
Mu mezi hafi umunani umutoza Sétien yari amaze atoza FC Barcelona, nta gikomeye yayigejejeho kitari ukurangiza umwaka w’imikino nta gikombe na kimwe itwaye.