Abantu 88 banduye Covid-19 mu Rwanda abandi 4 barayikira
Minisiteri y’Ubuzima yatangaje ko uyu munsi tariki ya 26 Kanama 2020. noneho mu Rwamda habonetse abanduye bashya bari munsi ya 100. Byaherukaga mu minsi 5 ishize.
Uyu munsi mu Rwanda habonetse abantu 88 banduye Covid-19 barimo ab’I Kigali:79 (bapimwe mu masoko ya Kigali),Rusizi:3 Rubavu:2,Karongi:2, Nyamasheke:1, Kamonyi:1. Abamaze kwandura bose ni 3,625.
Uyu munsi kandi hakize abantu 4 bituma umubare w’abakize bose uba 1810,abakirwaye:1800.Abapfuye:15
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Mu gukomeza kwirinda ikwirakwira rya Coronavirus, abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.
Icyorezo cya COVID-19 kikiza ubushakashatsi bwakozwe bwagaragaje ko abakuru bafite ibyago byo kuyandura ndetse bagaragaza ibimenyetso kurusha abato, gusa kuri ubu biri kugenda bigaragara ko umubare w’abato bandura iki cyorezo urushaho kwiyongera.
Igenzura ryakozwe n’Ishami ry’Umuryango w’Abibumbye ryita ku Buzima, OMS, rigaragaza ko kuva muri Gashyantare kugeza muri Nyakanga umubare w’abantu bato n’urubyiruko bandura COVID-19 ugenda urushaho kwiyongera.
Ni igenzura ryakozwe hakusanywa amakuru y’abantu miliyoni esheshatu banduye COVID-19 muri miliyoni zirenga 24 zimaze kuyandura ku Isi hose.
Muri izi miliyoni esheshatu byagaragaye ko umubare w’abantu bandura COVID-19 bari hagati y’imyaka itanu na 14 wazamutse ukava ku kigero cya 0.8% ukagera kuri 4.6%.
Kuzamuka k’umubare w’abandura COVID-19 biri kugaragara kandi mu bantu bari hagati y’imyaka 15 na 24 aho ikigero banduragaho cyazamutse ki kava kuri 4.5% kigera kuri 15%.
Umukozi wa OMS uyoboye ibikorwa byo kurwanya COVID-19, Maria Van Kerkhove, avuga ko uku kwiyongera k’umubare w’abato bandura iki cyorezo ‘biteye inkeke’ bikaba bishyira no mu kaga ubuzima bw’abakuze b’abana nabo.
Yagize ati “Abantu bato bakunze kutarembywa n’iki cyorezo cyangwa ngo bagaragaze ibimenyetso, bikaba ari byiza kuri bo ariko abenshi muri bo babana n’abantu bakuze bazahazwa cyane n’iki cyorezo.”
Yakomeje agira ati “Niba dufite umubare munini w’abato bandura, hari ibyago byo kwanduza abandi, bashobora no kuba bari mu cyiciro kizahazwa na COVID-19 kandi turabizi ko abari muri iki cyiciro baba bafite n’ibyago byo guhitanwa nayo.”
Zimwe mu mpamvu Maria Van Kerkhove atanga zishobora kuba zituma umubare w’abato bandura COVID-19 ugenda wiyongera harimo kuba ibikorwa byarongeye gufungura abantu bagasubira mu kazi no mu bindi bikorwa nk’uko byari bisanzwe.
Ati “kongera gufungura aho tuba, hari impinduka byazanye mu mico yacu, abantu benshi barasohoka, basubiye mu kazi, bajya mu bikorwa bitandukanye,..,byatumye habaho imihindagurikire mu buryo twitwara yatumye abantu bato benshi bajya mu byago byo kwandura iyi virusi.”
Indi mpamvu itangwa na Van Kerkhove ni uko ubu ibihugu byashyize n’umuhate mu gupima abantu batagaragaza ibimenyetso bikomeye mu gihe COVID-19 ikiza byibandaga mu gupima abamaze kugaragaza ibimenyetso.
Kugeza ubu ku Isi yose umubare w’abanduye COVID-19 urarenga miliyoni
24 105 584 mu gihe abo imaze guhitana barenga ibihumbi 824.
Mu bihugu biza ku isonga mu kugira umubare munini w’abanduye COVID-19 harimo Leta Zunze Ubumwe za Amerika, Brésil, u Buhinde n’u Burusiya.
