Print

Abantu 18 biganjemo abo mu nkambi y’impunzi banduye COVID-19 mu Rwanda abandi 14 barayikira

Yanditwe na: Dusingizimana Remy 19 October 2020 Yasuwe: 1316

Minisiteri y’Ubuzima yatangaje ko kuri uyu wa Mbere tariki ya 19 Ukwakira 2020, abantu 18 basanzwemo COVID-19 mu gihe abandi 14 bayikize mu bipimo 1,373 byafashwe.Umubare w’abamaze kwandura iki cyorezo wabaye 4,992.

Abasanzwemo Coronavirus uyu munsi barimo ab’I Kigali:8, Kirehe:10 (abapimwe mu nkambi y’impunzi).

Umubare w’abamaze gukira bose hamwe wabaye 4,797.Abakirwaye ni 161 mu gihe abamaze gupfa bose ari 34.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.

Ubushakashatsi bwakorewe mu Bwongereza bwagaragaje ko abantu banduye COVID-19 bagasezerwa mu bitaro bashobora gukomeza kugaragaza ibimenyetso byayo birimo guhumeka bigoranye, umunaniro, kwiheba n’agahinda gakabije mu gihe kiri hagati y’amezi abiri n’atatu.

Ubu bushakashatsi bwayobowe n’intiti zo muri Kaminuza ya Oxford, bwibanze ku kureba ku ngaruka z’igihe kirekire abarwayi 58 ba COVID-19 bahuye nazo. Bwasanze kimwe cya kabiri cyabo bakomeza kugaragaza ibimenyetso.

CNN yanditse ko abo bashakashatsi basanze bamwe mu barwayi bafite ibibazo by’ingingo zidakora neza kubera ingaruka zagizweho na Coronavirus.

Nubwo ubu bushakashatsi butagenzuwe n’abandi bahanga mu bya siyansi bwanyujijwe mu kinyamakuru MedRxiv mbere y’uko butangazwa.

Umuganga mu Ishami ry’Ubuvuzi muri Kaminuza ya Oxford wayoboye ubushakashatsi, Betty Raman, yavuze ko ibyabuvuyemo bitanga umukoro wo kunoza uburyo abarwayi basezerewe kwa muganga bakwiye gukurikiranirwa hafi.

Raporo y’Ikigo gishinzwe Ubushakashatsi mu by’Ubuzima mu Bwongereza, (NIHR) yatangajwe mu cyumweru gishize yerekanye ko indwara zikurikira ubwandu bwa COVID-19 zishobora kugaragaza ibimenyetso bifata umubiri n’intekerezo.

Ubushakashatsi bwa Oxford bwagaragaje ko hagati y’amezi abiri n’atatu nyuma yo kugaragara kwa COVID-19, abarwayi 64% bagize ikibazo cyo guhumeka nabi mu gihe 55% bari bafite umunaniro ukabije.

Icyuma kinyuzwamo abarwayi [MRI] cyagaragaje ko abagera kuri 60% bari bafite ikibazo cy’ibihaha, 29% barwaye impyiko, 26% bafite icy’umutima mu gihe 10% bari bugarijwe n’umwijima.