Tanzania: Tundu Lissu utavuga rumwe n’ubutegetsi avuga ko habayeho uburiganya mu matora ’butarimo no kugira isoni’
Ariko akanama k’amatora kavuga ko ibyo birego nta shingiro bifite.
Abakoresha internet na bo batangaje ko imbuga nka WhatsApp na Twitter zahagaritswe. Gutora byakozwe mu ituze no mu mahoro, nyuma yuko mu birwa bya Zanzibar ho habaye ibikorwa by’urugomo ku wa kabiri.
Gutora byarangiye ejo ku wa gatatu, ibyavuze mu matora byitezwe gutangazwa mu gihe cy’icyumweru.
Perezida John Magufuli wo mu ishyaka ’Chama Cha Mapinduzi’ (CCM) riri ku butegetsi kuva ryashingwa mu mwaka wa 1977, arimo guhatanira manda ya kabiri y’imyaka itanu.
Uw’ingenzi cyane mu bo bahatanye ni Tundu Lissu, mu mwaka wa 2017 warokotse igitero cyari kigamije kumwica.
Yasubiye mu gihugu mu kwezi kwa karindwi avuye mu Bubiligi, aho yavuriwe ibikomere by’amasasu.
Bose hamwe, ni abakandida 15 bahatanye muri aya matora - barimo na Bernard Membe wigeze kuba Minisitiri w’ububanyi n’amahanga akaza guhinduka unenga bikomeye Bwana Magufuli, nyuma yo kwirukanwa mu ishyaka CCM.
Ibirego ni ibihe?
Amashyaka atavuga rumwe n’ubutegetsi ya ACT-Wazalendo na ’Chama cha Demokrasia na Maendeleo’ (CHADEMA) yavuze ko habaye uburiganya mu matora.
Mu ruhererekane rw’ubutumwa bwo kuri Twitter ejo ku wa gatatu, Bwana Lissu, umukandida wa CHADEMA, yavuze ko habayeho uburiganya mu matora "butarimo no kugira isoni".
Yatangaje ubutumwa bwari bwatangajwe mbere n’undi muntu (uburyo bwa ’retweet’) bwa videwo isa nk’iyerekana abaturage bafashe umufuka wuzuye impapuro z’itora zari zamaze kuzuzwa, zose zatoye CCM.
Yavuze ko yahawe amakuru yuko ahantu hose hari ibitagenze neza, harimo ko n’indorerezi z’abakandida batavuga rumwe n’ubutegetsi zabujijwe kugera ku biro by’amatora.
Umucamanza Semistocles Kaijage ukuriye akanama k’amatora ka Tanzania, yahakanye ibyo birego, avuga ko nta shingiro bifite.
BBC