Covid-19 yahitanye umuntu wa 41 mu Rwanda abandi 50 barayandura
Ibipimo 2,860 byafashwe uyu munsi byagaragaje ko abantu 50 aribo bashya bagaragaweho ubwandu bwa COVID-19 mu Rwanda.
Umubare w’abamaze kwandura bose wabaye 5,312.Uyu munsi hakize abantu barindwi bituma umubare w’abamaze gusezererwa mu bitaro uba 4,974.Abakirwaye ni 297.
Abarwayi bashya bagaragaye muri Kigali:27 (abapimwe muri Gereza ya Nyarugenge), Kirehe:6, Rubavu:12 (abapimwe mu bibasiwe kurusha abandi), Rwamagana:5
Kuva umurwayi wa mbere wa Coronavirus agaragaye mu Rwanda, ku wa 14 Werurwe 2020, hamaze gufatwa ibipimo 577 736. Kuri ubu mu ngo ndetse n’ibitaro bivurirwamo abarwayi ba Coronavirus harimo 297 bari kwitabwaho n’abaganga umunsi ku wundi.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.
Uburusiya bwatangaje ko urukingo Sputnik V rurinda umuntu kwandura Covid-19 ku gipimo cya 92% nk’uko byerekanwa n’ibipimo by’agateganyo byavuye mu igerageza.
Byatangajwe n’ikigega cya leta gishinzwe iby’imari uyu munsi ku wa gatatu nk’uko bivugwa n’ibiro ntaramakuru Reuters.
Ibi byavuye mu cyiciro cya nyuma cy’igerageza ry’urukingo ku bantu bibaye ibya kabiri ku isi, mu muhate wo gukora urukingo rw’iki cyorezo kimaze kwica abarenga miliyoni 1.2 kikanangiza ubukungu ku isi.
Ku wa mbere, kompanyi ebyiri iyo mu Budage n’iyo muri Amerika ziri gufatanya, zatangaje ibyavuye mu igerageza nk’iri ry’urukingo rwazo, zivuga ko rukingira Covid ku gipimo kirenga 90%.
Izi nkingo zose ntiziremezwa n’abashinzwe ubuzima ku isi ko zatangira guterwa abantu ku isi.
Mu kwezi kwa munani Uburusiya ni cyo gihugu cya mbere cyatangaje ko cyageze ku rukingo bise Sputnik V, hakurikiyeho igerageza ku bantu benshi.
Ibi byavuye muri iryo gerageza by’agateganyo, bishingiye ku cyiciro cya mbere ku bantu 16,000 bahawe urwo rukingo rwa doze ebyiri nk’uko bivugwa na Russian Direct Investment Fund (RDIF) yateye inkunga ikorwa ryarwo.
Iri gerageza ryose riri gukorwa ku bantu 40,000 ahantu hatandukanye mu mujyi wa Moscow nk’uko Reuters ibivuga, 1/4 cyabo bahabwa umuti umeze nk’urwo rukingo (ibizwi nka ’placebo’).
Abatewe Sputnik V yabarinze kwandura Covid-19 ku rugero rwa 92% kurusha abatewe umuti umeze nkayo, nk’uko ikigega RDIF kibivuga.
