DR Congo: Tshisekedi agiye gushinga Leta nshya igabanyiriza imbaraga Kabila
Mu ijambo ryanyuze kuri televiziyo ku cyumweru, Bwana Tshisekedi yavuze ko agiye gushyiraho umutegetsi wo gufasha gushyiraho urugaga rushya rw’ubwiganze mu nteko ishingamategeko, isanzwe yiganjemo abayoboke ba Bwana Kabila.
Yavuze ko bibaye ngombwa yiteguye gusesa inteko ishingamategeko yose.
Ibi Tshisekedi yabitangaje nyuma y’aho byangiye ko yiyunga na FFC n’abayoboke b’uwo yasimbuye Joseph Kabila usanzwe afite abantu benshi mu nteko ishinga amategeko.
Tshisekedi yasimbuye Kabila mu kwezi kwa mbere 2019, biba ubwa mbere habayeho gusimburana kw’abaperezida mu mahoro kuva icyo gihugu gihawe ubwigenge n’Ububiligi mu 1960.
Perezida Tshisekedi yavuze ko amaze ukwezi abaza imitwe ya politike hamwe n’abandi bafite izina rikomeye muri politike kandi avuga ko badashyigikiye ko ishyaka rya Cap pour le Changement, Cach wiyunga na FCC.
Mu minsi ya vuba ishize, umunyamabanga mukuru wa ONU/UN n’umukuru w’umuryango w’ubumwe bw’Afurika (AU) bavuze ko batewe impungenge n’ubushyamirane bukomeje kwiyongera hagati y’abashyigikiye Bwana Tshisekedi na Bwana Kabila.
Hashize hafi imyaka ibiri Bwana Tshisekedi ageze ku butegetsi, nyuma y’amasezerano yagiranye na Bwana Kabila yakurikiye amatora yabonywe na benshi nk’ayaranzwemo uburiganya.
BBC