Abantu 74 bakize Covid-19 mu Rwanda abandi 71 barayandura
*
Kuva ku wa 14 Werurwe 2020 ubwo umurwayi wa mbere yabonekaga mu Rwanda hamaze gufatwa ibipimo bya Coronavirus 657,995, byasanzwemo 6,349 banduye.
Muri bo 5,789 barasezerewe nyuma yo gupimwa bagasangwa nta bwandu bagifite mu mibiri yabo mu gihe 507 bakiri kwitabwaho.Umubare w’abamaze guhitanwa n’iki cyorezo mu Rwanda ni 53.
Coronavirus ni indwara itarabonerwa umuti cyangwa urukingo ndetse mu kwita ku wayanduye havurwa ibimenyetso byayo birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda imihuro itari ngombwa no kwambara udupfukamunwa n’amazuru.
Ishami ry’Umuryango w’Abibumbye rishinzwe kwita ku buzima, OMS ryagaragaje ko 18,3% by’abicwa na Covid-19 ku mugabane wa Afurika baba basanganywe uburwayi bwa Diabète.
Diabète kimwe n’ubundi burwayi bwa karande ni bimwe mu bishobora gutuma umuntu wanduye Covid-19 imuzahaza cyangwa ikaba yamuhitana. Ikindi gishobora gutuma umuntu amererwa nabi n’iki cyorezo ni izabukuru.
Umuyobozi wa OMS muri Afurika Dr Matshidiso Moeti, yavuze ko ikirushaho kubigira bibi cyane ari uko hari umubare munini w’abantu muri Afurika bafite diabète ariko bakaba batabizi.
Ati “Abantu benshi ntibazi ko bafite diabète cyangwa batayifite. Abantu bafite ubu burwayi iyo banduye Covid-19 baremba byikubye kabiri, ibi tugomba kubihindura binyuze mu gupima diabète hakiri kare, kuyirinda no kuyivura. »
Kugeza ubu ku Isi yose abamaze kwandura Covid-19 babarirwa muri miliyoni 68 mu gihe abagera kuri miliyoni 1,5 yabahitanye muri aba abarenga miliyoni 1.5 banduye ni abo ku Mugabane wa Afurika.
