Perezida Yoweri Museveni yibasiye abanyamahanga, Polisi ,Komisiyo y’Amatora avuga no kuri Bobi Wine
Perezida Museveni yongeye gushimangira ko imyitwarire ya Bobi Wine bahataniye umwanya w’Umukuru w’Igihugu idahwitse kuko ngo ishyira ubuzima bw’abaturage mu kaga ko kwandura icyorezo cya Covid-19.
Ni ikosa uyu Mukuru w’Igihugu yashinje Bobi Wine kuva ibikorwa byo kwiyamamaza byatangira hagati mu Gushyingo 2020, nyuma yo kubona ko uyu mukandida akurikirwa n’imbaga nyinshi y’urubyiruko, rurenga umubare wemewe mu buryo bwo kwirinda iki cyorezo. Ati: “Bobi Wine ntabwo ari gukurikiza amabwiriza.”
Perezida Yoweri Museveni yagaragaje ko ikosa riri kuri Komisiyo y’Igihugu y’Amatora ishinzwe gukurikirana amabwiriza yashyizeho agomba kubahiriza mu bikorwa byo kwiyamamaza, Polisi y’Igihugu ishinzwe umutekano ndetse n’abanyamahanga bashyigikiye Bobi Wine.
Kuri Komisiyo ishinzwe amatora na Polisi, Perezida Museveni yavuze ko atazi impamvu byemera ko ibi ngibi bikomeza. Ati: “Ntabwo nzi impamvu Komisiyo y’Amatora (EC) ya Justice Byabakama ndetse na Polisi byemera ko aya mafuti akomeza. Ntabwo nishimiye EC.”
Yaje kugaragaza ko kandi aba banyamahanga cyangwa se Abazungu ari intambamyi ku bikorwa byo kwiyamamaza, bitewe n’uko bashyigikiye Bobi Wine. Ati: “Abo tutavuga rumwe n’abanyamahanga babashyigikiye ntacyo bamaze. Bashobora gushyira amahoro ku iherezo. Abanyamahanga baduhera abana marijuana kugira ngo bateze akaduruvayo.”
Mu gihe Perezida Yoweri Museveni yari akivuga ku banyamahanga kandi, yavuze ko amatora agomba kugenda neza kubera ko ari byo [NRA] barwaniriye. Ati: “Twabirwaniye imyaka irenga 40. Nta n’umwe uzahungabanya amahoro. Iyi mikino yose iri gukinwa n’Abazungu, ndabifuriza amahirwe. Uzashaka kubangamira uburenganzira bwacu, azatsindwa.”