Gor Mahia yatandukanye na Robertinho kubera ikibazo cy’ibyangombwa
Nubwo yari amaze amezi abiri gusa agizwe umutoza mukuru w’iyi kipe,Robertinho yemeye gusesa amasezerano n’iyi kipe nyuma y’aho abujijwe gutoza imikino ya APR FC bitewe no kutagira ibyangombwa byemewe na CAF.
Robertinho afite Licence B yo gutoza yahawe n’Ishyirahamwe ry’Umupira w’Amaguru muri Brésil, ifite agaciro kangana na Licence C ku mugabane wa Afurika mu gihe ugomba gutoza mu marushanwa ya CAF agomba kuba afite License A cyangwa B.
Tariki 10 Ukwakira 2020, ni bwo Gor Mahia yatangaje ko yabonye umutoza mushya Robertinho, akaba yaraje asimbura umutoza witwa Steven Polack wari watandukanye n’iyi kipe tariki 9 Ukwakira 2020.
Kuri uyu wa Gatandatu tariki 12 Ukuboza 2020, ikipe ya Gor Mahia yatangaje ko yatandukanye na Robertinho mu buryo bwemewe n’amategeko, umutoza Samuel Omollo akaba ari we urakomeza gutoza iyi kipe nk’umutoza w’agateganyo, aho iyi kipe ikomeje imyiteguro yo kwesurana na CR Belouizdad yo muri Algeria bazahura mu ijonjora rya kabiri rya TOTAL CAF Champions League.
Robertinho amaze imyaka 25 mu kazi ko gutoza ndetse yatoje mu bihugu bitandukanye byo muri Afurika no muri Brazil.
Mu ijoro ryo kuwa Kabiri tariki 13 Kanama 2019 nibwo umutoza wahesheje Rayon Sports igikombe cya shampiyona cya 2018, Roberto Oliveira Gonçalves do Carmo, bita Robertinho yasezeye ku buyobozi bw’iyi kipe yatoje kuva muri Kamena 2018.
Roberto Oliveira Gonçalves do Carmo yatandukanye na Rayon Sports ayihesheje ibikombe bibiri, kimwe cya shampiyona 2018-19 n’igikombe cy’Agaciro 2018.