Abantu babiri bo mu mujyi wa Kigali bishwe na Coronavirus abandi 127 barayandura
Minisiteri y’Ubuzima yatangaje ko uyu munsi tariki ya 19 Ukuboza 2020,abagabo babiri barimo bo mu Mujyi wa Kigali, bishwe na COVID-19 bituma umubare w’abamaze guhitanwa n’iki cyorezo mu Rwanda uba 59.
Abanduye iki cyorezo babonetse I Kigali: 76 (Abahuye n’abanduye bari kuvurirwa mu ngo), Rusizi: 12, Musanze: 12, Rubavu: 11, Gakenke: 6, Kirehe: 5, Huye: 2, Kayonza: 1, Rwamagana: 1, Muhanga: 1.
Uyu munsi kandi,abantu 127 basanzwemo ubwandu bwa COVID-19 mu bipimo 4,076 byafashwe, mu gihe nta muntu wayikize mu masaha 24 yashize.
Kuva ku wa 14 Werurwe 2020 ubwo umurwayi wa mbere yabonekaga mu Rwanda,abantu7,232 banduye Coronavirus. Muri bo 6,089 barasezerewe nyuma yo gupimwa bagasangwa nta bwandu bagifite mu mibiri yabo mu gihe 1,084 bakiri kwitabwaho.
Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.
Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.
Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi.
Umubare w’abantu bamaze gupfa bishwe na Coronavirus mu Bufaransa warenze ibihumbi 60 bituma iki gihugu kiba birindwi bya mbere bimaze kugira abantu benshi bahitanwe n’iki cyorezo.
Kuri uyu wa Gatanu mu Bufaransa habonetse impfu 610 za COVID-19 zituma umubare w’abapfuye wose ugera ku 60.229.
Muri abo bapfuye ku munsi w’ejo harimo 264 baguye mu bitaro ugereranyije no ku munsi wabanje biyongereyeho abantu batandatu. Abandi 346 bapfuye kuri uyu wa Gatanu bo babonetse mu ngo z’abageze mu zabukuru.
Reuters yatangaje ko iki gihugu kandi cyabonye ubwandu bushya bugera ku 15.674 mu masaha 24, umubare muto ugereranyije n’ubwandu bushya bwari bwabonetse ku wa Kane aho bari 18.254.
Mu banduye bashya ku wa Kane harimo na Perezida w’iki gihugu, Emmanuel Macron, wahise wishyira mu kato aho ari kwitabwaho n’abaganga nubwo akomeje imirimo ye.
Kugeza ubu, mu Bufaransa abantu bamaze kwandura ni 2.442.990 mu gihe abamaze guhitanwa n’iki cyorezo ari 60.229, abakize bo ni 182.656.
Usibye u Bufaransa, ibindi bihugu bifite impfu zirenze ibihumbi 60 ni Leta Zunze Ubumwe za Amerika, u Buhinde, Brésil, u Bwongereza, u Butaliyani na Mexique.
