Hahishuwe ibanga rikomeye ryatumye Real Madrid yari igeze aharindimuka ikomeje gutsinda umusubirizo muri iyi minsi
Nyuma yo gutsindwa na Shakhtar Donetsk ibitego 2-0 muri Champions League irushwa,abakinnyi bakuru mu ikipe ya Real Madrid bahise basanga umutoza Zinedine Zidane bamubwira ikintu gikomeye atari azi.
Itsinda ry’abakinnyi bayoboye muri Real Madrid barimo Sergio Ramos, Luka Modric, Karim Benzema, Casemiro na Toni Kroos basanze umutoza Zinedine Zidane bamubwira ko guhora ahindura ikipe ibanzamo buri mukino aribyo bibatsindisha bityo akwiriye kwicara agashaka abakinnyi 11 bahoraho bagashaka intsinzi.
Toni Kroos bivugwa ko ariwe watanze iki gitekerezo mbere,yabwiye Zidane ko hakenewe ko apanga uburyo bumwe bw’imikinire ndetse agatoranya abakinnyi 11 badahinduka bo kuzajya babanza mu kibuga wenda hakaba impinduka hari uwavunitse cyangwa uwahawe amakarita.
MARCA yatangaje ko icyatumye Real Madrid itsindwa umusubirizo mu kwezi kwa 10 n’ukwa 11 ari uko abakinnyi batari bishimiye uko bakinishwa aho Zidane yahinduraga ikipe nk’uhindura imyenda yo kwambara.
Zidane usanzwe uzwiho gufunga umutwe yumviye inama yahawe na ba kizigenza be, ikipe itangira bahondagura amakipe guhera ku mukino wa Sevilla,Atletico Madrid,Monchengladbach,n’izindi.
Ntawatinya kuvuga ko izi mpera z’umwaka zitumye Real Madrid yerekana ko ari urutare kuko uburyo isigaye ikina bitanga icyizere ko ishobora kwisubiza La Liga ndetse ikagera kure muri UEFA Champions League.
Kuva Real Madrid yatsindwa na Shakhtar Donetsk,imaze gutsinda imikino 6 yikurikiranya ndetse ntawe urabasha kuyinjiza ibitego 2.
Kuva Zidane yagirwa iyi nama,ntiyigeze yongera guhindagura ikipe uretse Vinicius uheruka kubura kubera uburwayi ndetse biteganyijwe ko na Rodrygo ashakirwa umusimbura kuko yavunitse.
Inama Zidane yagiriwe yatanze umusaruro