Umuherwe wa Chelsea yafashe icyemezo cyo kwirukana umutoza Frank Lampard
Ikinyamakuru The Daily Telegraph kimaze gutangaza ko abakinnyi b’iyi kipe babwiwe ko batagomba kuza mu myitozo kuri uyu wa mbere mu gitondo ahubwo baraza saa sita.
Uyu mwanzuro wabwiwe abakinnyi nyuma y’uko hafashwe umwanzuro w’uko Frank Lampard agomba kwirukanwa hagashyirwaho umutoza washobora gutwara ibikombe.
Chelsea yatsinze ikipe yo mu cyiciro cya kabiri yitwa Luton Town ibitego 3-1 muri FA Cup kuri iki cyumweru,ariko ibi ntibyigeze bifasha Lampard kuko uyu munsi urarangira yamaze kwirukanwa nkuko ibinyamakuru byose I Burayi byabitangaje.
Chelsea yatsinzwe imikino 5 mu munani iheruka gukina muri Premier League byatumye iva mu rugamba rwo gushaka igikombe yahabwaga kubera abakinnyi benshi kandi bakomeye yaguze.
Lampard w’imyaka 42 wari umutoza wa Derby County yo mu cyiciro cya kabiri,yagizwe umutoza mukuru wa Chelsea kuwa 4 Nyakanga 2019, yamazemo imyaka 13 ari umukinnyi,
Uyu mugabo yafashije Derby County kugera ku mukino wa nyuma wa Play-off, ubwo yatsindwaga na Astom Villa ibitego 2-1 mu mwaka we wa mbere nk’umutoza mukuru, akabura amahirwe yo kuzamuka muri Premier League.
Ibi byatumye Chelsea imurambagiza imuha akazi muri 2019 gusa ntiyatwara igikombe kubera ko yari yafatiwe ibihano na FIFA byo kutagura abakinnyi bituma Lampard akinisha cyane abana.
Nk’umukinnyi, Lampard ukomoka mu Bwongereza yanakiniye, yafashije Chelsea gutwara ibikombe 11 mu mikino 648 yayikiniye.
Frank Lampard n’umutoza wa 10 wahawe akazi muri Chelsea nyuma y’uko iguzwe na Roman Abramovich mu 2003.
Uyu mutoza w’Umwongereza ari ku mwanya wa 4 mu bitwaye nabi kuko buri mukino yatoje afite impuzandengo y’inota 1.67.
Biravugwa ko Max Allegri cyangwa Thomas Tuchel aribo bari imbere mu bagomba gusimbura Frank Lampard.