Guardiola yahaye igisubizo gitangaje abamushinja ko atsinda kubera gushora akayabo ku isoko
Yanditswe: Tuesday 14, May 2024
Umutoza Pep Guardiola avuga ko Manchester United na Chelsea zakabaye zihataniye igikombe cya Premier League nkabo [Manchester City] na Arsenal iyaba amafaranga ariyo atanga intsinzi.
Uyu mutoza wa City yamaganye igitekerezo cy’uko gushora amafaranga menshi ku isoko aribyo bitanga intsinzi kuko ngo iyo ibyo biba ari ukuri ikipe ye iba itari iya mbere.
Ibi yabivuze ubwo yari abajijwe niba gutwara Premier League kwe bitarambiranye.
Man City isabwa gutsinda imikino ibiri ifite hanyuma igakora amateka yo kwegukana igikombe cya shampiyona y’Ubwongereza ku nshuro ya kane yikurikiranya.
Pep yagize ati: "Ntabwo birambiranye.Biragoye.
Mbere, byari amafaranga.Bibaye ariyo mpamvu, Manchester United yari ikwiye gutwara ibikombe byose, Chelsea - ibikombe byose, Arsenal - ibikombe byose. Bakoresheje amafaranga menshi mu myaka itanu ishize kuturusha. Bakagombye kuba bahari [bahatanye]. Ntabwo bahari.
Ariyo mpamvu, Girona ntiyakagombye kuba muri Champions League [umwaka utaha] na Leicester ntiyari gutwara Premier League.”
Man City kandi ishobora kuba ikipe ya mbere itwaye shampiyona ndetse na FA Cup mu myaka ibiri ikurikiranye.
Man City ihagaze neza kuko imaze imikino 21 idatsindwa harimo imikino ine gusa yanganyije.
Mu mikino ine ishize,binjije ibitego 15-1.
Nubwo batarinjiza igitego muri shampiyona kuri stade nshya ya Tottenham Hotspur, bake ni bo biteze ko City itakaza amanota,mu ijoro ryo kuri uyu wa Kabiri.
Leave a Reply
Your email address will not be published. Required fields are marked *