Abatangaje ko Yuhi VI ari we mwami uzasimbura Kigeli V bibeshye nkana cyangwa hari ikibyihishe inyuma ?

10 January 2017. | Opinion | 5 Ibitekerezo | Nsanzimana Ernest
  • Abatangaje ko Yuhi VI ari we mwami uzasimbura Kigeli V bibeshye nkana cyangwa hari ikibyihishe inyuma ?

Kuri uyu wa 9 Mutarama 2017 nibwo hamenyekanye amakuru avugwa ko Emmanuel Bushayija ari we mwami uzasimbura Kigeli V Ndahindurwa, agahabwa izina rya Yuhi VI Bushayija. Uretse ko mu Rwanda ubutegetsi bwa Cyami bwakuwe na Repubulika, ukurikije amateka y’ u Rwanda, igisobanuro, amatwara n’ amateka y’ abami usanga Kigeli V atakagombye gusimburwa n’ umwami witwa Yuhi VI.

Umwami Kigeli II NYAMUHESHERA wategetse u Rwanda kuva 1576 kugeza mu wa 1609, yashyizeho umurongo ngenderwaho w’ ubutegetsi bwa Cyami. Ashyiraho itonde ry’ uko abami b’ u Rwanda bazajya bitwa hakurikijwe igihe bimikiwe n’ uwo basimbuye.

NYAMUHESERA yategetse ko amazina y’ abami azajya asimburana mu buryo bukurikira. CYILIMA, KIGELI, MIBAMBWE, YUHI. Ibi bisobanuye ko umwami witwa Kigeli agomba gusimburwa n’ umwami witwa MIBAMBWE.

Buri mwami yabaga afite icyo agomba kwibandaho bitewe n’ izina yahawe. Abami bitwa ba CYILIMA, na ba MUTARA bari abami bashinzwe kwita ku bworozi. Ku ngoma y’ aba bami inshingano nyamukuru yabo yabaga ari ukongera inyambo mu gihugu.

Umwami wimaga agahabwa izina rya KIGELI yabaga ari ‘umwami w’ Inkotanyi’ Inshingano ya ba Kigeli yari ukugaba ibitero no kwagura igihugu. Niyo mpamvu ba Kigeli aribo bamenyekanye nk’ abami baguye u Rwanda urugero Kigeli IV RWABUGILI.

Izina YUHI bisobanura “Umwami w’umuriro”. Impamvu yitwaga Umwami w’umuriro, ni uko ku ngoma ye yagombaga kurinda ubusugire bw’igihugu. Akaba umwami w’intagondwa ku buryo ntawabasha kuvogera igihugu cyangwa se abaturage bacyo. Yuhi, yari umwami wagombaga kubungabunga umuco w’igihugu ku buryo urushaho gusakara muri bene wo.

Ukurikije itonde ry’ amazina y’ abami ryashyizweho na Kigeli II NYAMUHESHERA, Kigeli V Ndahindurwa yakagombye gusimburwa n’ umwami witwa Mibambwe V. Umuntu yakwibaza imvano yo kuba haratangajwe ko Kigeli V Ndahindurwa azasimburwa na Yuhi VI Bushayija.

Umwami Kigeli V Ndahindurwa wategetse u Rwanda kuva kuwa 28 Nyakanga 1959 kugera ahiritswe ku butegetsi kuwa 28 Mutarama 1961 yatanze mu ijoro ryo kuwa Gatandatu rishyira ku Cyumweru tariki 16 Ukwakira 2016.

Uyu mwami akimara gutanga hakurikiyeho ihurizo ryo kwemeza aho azatabarizwa. Bamwe mu bo mu muryango we bifuzaga ko yatabarizwa mu mahanga abandi bifuza ko yatabarizwa mu Rwanda, bitabaje inkiko zo muri Amerika birangira ku wa 5 Mutarama 2017, urukiko rwanzuye ko Kigeli V Ndahindurwa azatabarizwa mu Rwanda.

Tariki ya 9 Mutarama 2017 nibwo umugogo wa Kigeli V wajejwe mu Rwanda, kuri iyi tariki ninabwo humvikanye amakuru avugwa ko Kigeli V Ndahindurwa azasimburwa na Yuhi VI.
Icyari gisigaye nk’ ihurizo ni ukumenya uburyo uyu mwami azatabarizwa adasize umusimbura kandi mu muco nyarwanda umwami yaratabarizwaga ari uko yabonye umusimbura. Iki nacyo gisa ni ikigenda gisobanuka kuko abo mu muryango w’ umwami Kigeli V ’Abahindiro’ barimo gutegura uburyo bwo kwimika umwami uzasimbura Kigeli V.

Ndahindurwa wari ugize imyaka 80 y’amavuko, avuka ku Mwami Yuhi V Musinga n’Umwamikazi Mukashema, i Kamembe mu Burengerazuba bw’u Rwanda.

Mu 1944, Umwami Yuhi V Musinga ‘yatangiye’ mu buhungiro muri Zaire ubu yabaye Repubulika Iharanira Demokarasi ya Congo, nyuma yo guhirikwa n’Ababiligi, asimburwa ku ngoma n’umuhungu we Rudahigwa, ahabwa izina rya Mutara III.
Ubwo Umwami Musinga yatangaga, Ndahindurwa yari umwana w’imyaka umunani. Yize amashuri yisumbuye muri Groupe Scolaire Astrida ubu yahindutse Groupe Scolaire Officiel de Butare, akomereza i Nyangezi muri Zaire.

Nyuma y’uko umuvandiwe we kuri Se, Mutara III Rudahigwa atanze bitunguranye ubwo yari yagiye kwivuriza i Bujumbura, kuwa 25 Nyakanga 1959, nyuma y’iminsi itatu byatangajwe ko Ndahindurwa abaye Umwami w’u Rwanda afata izina rya Kigeli V, icyo gihe akaba yari afite imyaka 23. Atanze yari akiri ingaragu kuko kugeza magingo aya yari atarashaka.

Kigeli V Ndahindurwa yabaye umwami kugeza tariki 28 Mutarama 1961, ubwo yahirikanwaga n’ingoma ya cyami ndetse Kamarampaka yemeza ko ingoma ya cyami isezererwa hakimikwa Repubulika. Yakuweho na Mbonyumutwa ubwo we (Kigeli V) yari yagiye i Kinshasa, aho yagombaga kubonana n’Umunyamabanga Mukuru w’Umuryango w’Abibumbye, Dag Hammarskjöld

Ibitekerezo
  • MyPassion

    mister
    10 January 2017 - Musubize

    Ariko Ko ingoma yacyami yavuyehokera ibyobibatesha umutwe byavuyehe Ko nitegeko nshinga ntahoriteganya ubwami ubwo muragorwa niki? Muriguha icyuho abarwanya ubutegetsi ngobagumye babarangaze babasubize inyuma mubyomwarimwaragambiriye kugeraho?ntimuziko uwarose nabi burinda bucya nimutangirana umwaka uburangare uzarangira ntacyomugezeho kandi icyocyuho kugisiba bizabagora

  • MyPassion

    UWAMUNGU
    10 January 2017 - Musubize

    sinumva impamvu abantu bazaryama i Mahanga babona imbuto zihiye ,bakaza gusarura,ese ,ko twavuga ibyiza Nyakubahwa PRESIDENT PAUL KAGAME Yatugejejeho ,uwo Kigeli twamuvuga tumuzi he,yakoze iki,arasiga avuga uzamusimbura se he ku bwami buhe?Turasobanukiwe mwe kutuzanamo Ibyarangiye DUFITE UBUYOBOZI TWIZEYE.

  • MyPassion

    Mahoro
    10 January 2017 - Musubize

    Niba nibuka amateka neza, batwigishije ko,ririya zina rya Mibambwe ryari ryarakuwe mu mazina yagombaga guhabwa abami (nyuma y’intambara yo ku Rucunshu ).

  • MyPassion

    KAGABE Paul
    10 January 2017 - Musubize

    Mwumve nkome..! Nahimana daa ! Ndavuga Rugira, simvuga Padiri Thomasi direko iyo havuzwe NAHIMANA imipaka ikazwa.

  • MyPassion

    Mahame
    10 January 2017 - Musubize

    Mbona abatangaje, Yuhi wa VI batibeshye kuko nibo bari hafi y’umwami Kigeli V, kuba umunyamabanga w’umuntu birahagije ngo akubwire gahunda ze n’ibyo ateganya, ndumva rero Umwami Kigeli ntacyo bakoze atarabibabwiye.

    Umutwe w’iyi nkuru ivuga ko abatangaje umwami Yuhi VI baba bibeshye nkana, nkeka ko nutarize amateka y’u Rwanda nibura akaba yarasomye ibitabo bivuga amateka y’u Rwanda mu gihe cy’abami yakwiha igisubizo. Ese ko Ruganzu Ndoli yakoze ibikomeye akagarura u Rwanda, kuki izina rye ritari rikiri ku rutonde rw’amazina y’ubwami? Ndahiro we se? ayo niyo nibuka, icyatumye rero umwami wimitswe adahabwa izina rya Mibambwe ntushakire ahandi.

Tanga Igitekerezo