Ikipe ya Inter Milan yatwariye igikombe cya shampiyona kuri mukeba w’ibihe byose AC Milan ihita inayirusha igikombe kimwe mu byo bamaze gutwara.

Sponsored Ad

Ibi byabereye mu mukino wa shampiyona aya makipe yakinnye kuri uyu wa mbere,Inter Milan itsinda ibitego 2-1 mu mukino wabereye San Siro.

Inter yafunguye amazamu hakiri kare cyane ku munota wa 18,ibifashijwemo na myugariro wayo Acerbi n’umutwe.

Igice cya kabiri kigitangira ku munota wa 49,Marcus Thuram yatsindiye Inter igitego cya kabiri bituma abafana bizera ko iki gikombe byanze bikunze gitaha.

Icyakora mu minota ya nyuma AC Milan yongereye imbaraga ndetse ibona igitego ku munota wa 80 gitsinzwe na Fikayo Tomori.

Iki gitego cyateye guhangana ku mpande zombi byatumye amakarita atukura atangira kwisuka.

Ku munota wa 3 w’inyongera,Denzel Dumfries na Theo Hernandez barwanye bahita bahabwa amakarita y’umutuku bombi.

nyuma y’iminota ine,myugariro wa AC Milan,Davide Calabria nawe yahawe ikarita itukura azira gukubita umukinnyi wa Inter.

Inter Milan yabashije kurinda iyi ntsinzi, itwara igikombe cya shampiyona habura imikino 5.Muri shampiyona yose yatsinzwe umukino umwe na Sasuolo muri Nzeri 2023.

Iyi ni inshuro ya gatandatu yikurikiranya Inter itsinda mukeba wayo AC Milan ndetse igiye kwambikwa inyenyeri ya kabiri kuko buri kipe yose yo mu Butaliyani ihabwa inyenyeri iyo yujuje ibikombe 10.

Lautaro Martinez wa Inter Milan niwe umaze gutsinda ibitego byinshi 23 arusha umukurikiye 6

Juventus niyo ifite ibikombe byinshi bya shampiyona, 36.Iyi shampiyona imaze gutwarwa n’amakipe 20 kuva mu 1898.