Mu mukino wayigoye cyane,Arsenal yatsinze Manchester United iyasanze iwayo igitego 1-0,bituma ikomeza kwiruka kuri Man City kugeza ku munsi wa nyuma,uzakinwa ku cyumweru.

Sponsored Ad

Arsenal yarangaye igatakaza umukino wa Aston Villa bigahesha Man City amahirwe yo gufata umwanya wa mbere,iri gusenga ngo mukeba wayo Tottenham izahagame City byibuze ibona igikombe cya shampiyona imaze imyaka 20 idakoraho.

Igitego cya Arsenal cyatsinzwe na Leandro Trossard ku munota wa 20,ku mupira mwiza yahawe na Kai Havertz.

Nubwo Arsenal yatsinze uyu mukino,yagowe bikomeye n’iyi Man Utd yaherukaga gutsindwa ibitego 4-0 na Crystal Palace.

Icyakora mu minota ya nyuma,Arsenal yahushije amahirwe akomeye arimo umupira Martinelli yateye Onana awukuramo.

Hari kandi ishoti rya Declan Rice naryo yakuyemo mu gihe hari n’igitego Bissaka yari yitsinze uyu munya Cameroon aratabara.

Nubwo Man United itabonye amahirwe akomeye yo gutsinda nka Arsenal ariko yayigoye cyane mu kugumana umupira kuko yageze aho iyobora umukino ku kigero cya 80%

Umukinnyi wayo Garnacho yagoye cyane ubwugarizi bwa Arsenal gusa imipira myinshi yagerageje yagiye hanze.

Arsenal isigaje umukino umwe wa Everton ku cyumweru,mu gihe Man City isigaje imikino ibiri irimo uwa Tottenham kuwa Kabiri na West Ham ku cyumweru.

Iyi ni intsinzi ya 27 ya Arsenal muri uyu mwaka w’imikino 2023/2024,nizo ntsinzi nyinshi mu mateka Arsenal igize mu mwaka umwe w’imikino wa Premier League

Iyi ni inshuro ya 10 igikombe cya Premier League kizamenya nyiracyo ku munsi wa nyuma wa shampiyona.

Arsenal ifite amanota 86 mu mikino 37 mu gihe Man City iri ku mwanya wa kabiri na 85 mu mikino 36 gusa.

Arsenal irusha ibitego 3 Man City ifite amahirwe menshi yo gutwara iki gikombe.