Perezida wa Philippines, Rodrigo Duterte w’imyaka 73 yatangiye gushinjwa icyaha cyo gufata ku ngufu no kubuza umudendezo abagore nyuma yo gutangaza ko akiri ingimbi yakorakoye umukozi w’iwabo asinziriye.

Sponsored Ad

Amatsinda ashinzwe uburenganzira bw’abagore yatangiye gushinja Rodrigo Duterte guhohotera abagore ndetse no gukangurira abantu gufata abagore ku ngufu nyuma yo kuvugira mu ruhame ko yakorakoye umukozi wari usinziriye.

Mu rwenya rwinshi perezida Rodrigo Duterte wa Philippines yabwiye abantu ku wa Gatandatu w’iki cyumweru ukuntu yagiye kwaka penetensiya padiri,akamubwira uko yinjiye mu cyumba cy’umukozi akamukorakora yasinziye ubwo yari ingimbi yiga mu mashuli yisumbuye.

Yagize ati “Nakuyeho uburingiti…Nkora ku cyari imbere mu ipantaro.Ndamukorakora,arakanguka.Nahise mpunga mva mu cyumba.”

Duterte yavuze ko yabwiye padiri ko yagarutse muri icyo cyumba nyuma yongera gukorakora umukozi w’iwabo.

Ukuriye ishyaka rigamije guharanira uburenganzira bw’abagore muri Philippines rya Gabriela,witwa Joms Salvador yavuze ko ibyo Duterte yavuze ari amahano akwiriye kwegura kuko yafashe ku ngufu umugore.

Yagize ati “Ntabwo gufata ku ngufu umugore ari ukwinjiza igitsina mu cye.No gushora intoki cyangwa ikindi kintu mu gitsina cye uba umufashe ku ngufu.Akwiriye kwegura.

Duterte akunze gukora udushya twinshi aho mu minsi ishize yise Imana igicucu ndetse yasomeye mu ruhame umugore w’abandi muri Koreya y’Epfo.