Ikipe ya Bayer 04 Leverkusen ikomeje kugira umwaka mwiza yageze ku mukino wa nyuma wa UEFA Europa League aho izahurira na Atalanta yo mu Butaliyani.

Sponsored Ad

Ikipe ya Bayer 04 Leverkusen yanganyije na AS Roma ibitego 2-2 mu mukino wo kwishyura iyisezerera ku giteranyo cy’ibitego 4-2 mu gihe Atalanta yihereranye Olympique de Marseille ikayitsinda 3-0 igahita igira 4-1 mu mikino yombi.

Ikipe ya AS Roma yabonye amahirwe yo gusezerera Bayer 04 Leverkusen kuko yayishyuye kare ibitego 2-0 yari yayitsinze ariko uburangare butuma yishyurwa byose.

Ibitego bya AS Roma byabonetse byose kuri penaliti zatewe na Leandro Paredes ku munota wa 43 na 66.

Nkuko imaze kubimenyereza abakunzi bayo,Leverkusen yishyuye ibi bitego mu minota ya nyuma ibifashijwemo na Gianluca Mancini witsinze ku munota wa 82 na Josip Stanišić ku munota wa 7 w’inyongera.

Bayer Leverkusen yanditse amateka yo kuba ikipe ya mbere i Burayi igeze ku mikino 49 itaratsindwa mu marushanwa yose.

Iyi kipe yakuyeho agahigo kari gafitwe na Benfica aho mu 1963-1965 yamaze imikino 48 itaratsindwa.

Undi mukino wari ukomeye muri iri joro wari wahuje Atalanta yo mu Butaliyani ndetse na Olympique de Marseille yo mu Bufaransa bari banganyije igitego 1-1 mu mukino ubanza.

Kuri uyu wa Kane,Atalanta yakubise itababariye Marseille kuko yayitsinze ibitego 3-0,iyisezerera nabi.

Ku munota wa 30,nibwo Ademola Lookman yafunguye amazamu,Matteo Ruggeri ashyiramo icya kabiri kuwa 52.El Bilal Touré yatsinze igitego cya gatatu mu minota y’inyongera.

Atalanta yasezereye ikigugu Liverpool,iri ku rwego rwo hejuru muri iyi minsi cyo kimwe n’iyi Leverkusen.Bazesurana ku mukino wa nyuma kuwa 22 Gicurasi.

Muri UEFA Conference League,Bwa mbere mu myaka 99 imaze ibayeho, Olympiacos yageze ku mukino wa nyuma w’irushanwa rikomeye ku mugabane w’Uburayi.Nta kipe yo mu Bugeleki iratwara irushanwa ryo ku mugabane w’Uburayi.

Ibi yabigezeho isezereye Aston Villa ku bitego 6-2 mu mikino yombi cyane ko mu ijoro ryo kuri uyu wa Kane yayitsinze 2-0 byiyongera kuri 4-2 yayitsindiye mu rugo.

Izahura ku mukino wa nyuma na Fiorentina yo mu Butaliyani.