Suella Braverman ntiyatinye kwemeza ko azashyigikira umugambi wo kwirukana Rishi Sunak ku buyobozi gahunda ye n’u Rwanda nidakunda.

Sponsored Ad

Uyu wahoze ari minisitiri ushinzwe ibibazo by’imbere mu gihugu yavuze ko "yiteze byimazeyo ko " Sunak azayobora ishyaka ry’aba conservateurs mu matora rusange ataha ariko atazi niba atazashyigikira icyemezo kimurwanya.

Abajijwe niba azashyigikira iki cyemezo mbere y’amatora rusange ataha, Madamu Braverman yabwiye BBC ati: "Nkuko nabivuze, sinkeka ko ibyo bizaba."

Abwiwe ko uko atari uguhakana, yagize ati: “Minisitiri w’intebe agiye kutuyobora mu matora rusange ataha. Mfite impungenge nyinshi ku nzira arimo. ”

Yongeye kubazwa niba azashyigikira umugambi wo kumweguza, yagize ati: “Namusabye guhindura inzira, inshuro nyinshi. Nizera ko tudatanga politiki cyangwa ibisubizo abaturage b’Abongereza bashyigikiye kandi ikibabaje ni uko amatora yose tureba muri iki gihe yerekana ko tugana ku gutsindwa. ”

Braverman yavuze ko yemera ko umushinga w’itegeko rirebana no kohereza abimukira mu Rwanda wa Sunak “ufite inenge ” kandi ko bitazatuma indege zitwaye abimukira zihaguruka.

Mu gitondo cyo kuri uyu wa Mbere, Sunak yagiranye ikiganiro n’abanyamakuru kuri Downing Street, asaba Inteko ishinga amategeko umutwe w’abadepite guhagarika kwitambika umushinga w’itegeko mbere y’amatora ateganijwe ku gicamunsi cyo kuri uyu munsi.

Ariko uwahoze ari minisitiri ushinzwe ibibazo by’imbere mu gihugu yemera ko umushinga w’itegeko “ufite ibyuho byinshi” kandi ko adatekereza ko uzagera ku ntego Sunak yihaye yo guhagarika amato yinjiza abimukira mu Bwongereza mu buryo butemewe.

Abajijwe impamvu zamuteye kurwanya amabwiriza ya Guverinoma, Madamu Braverman yagize ati: “Ndi umudepite w’umu-conservateur”.

Ati: "Akazi kanjye ni uguhagararira Abongereza ndetse n’abantu banyohereje mu Nteko kugira ngo mvugishe ukuri, kandi aho bashaka ko dutsinda amatora rusange ataha.

Ati: “Niyo mpamvu nizera ko dukwiye kuva mu Masezerano y’u Burayi y’Uburenganzira bwa Muntu, niyo mpamvu nizera ko dukeneye gushyiraho igitutu ku mibare rusange y’abimukira.

Ati: “Niyo mpamvu nizera ko dukeneye uburyo bukomeye kuri politiki, amategeko, n’imisoro.

Ati: “Nahoze nsaba ibyo bintu byose, ni uburenganzira bwanjye bwo kubikora nk’umuntu wita ku badushyigikiye.”

Kuva mu ntangiriro z’umwaka, havuzwe guhanganira ubuyobozi bw’ishyaka riri ku butegetsi, aho Madamu Braverman yakunze kuvugwa ko ashobora guhatanira uyu mwanya.

Gusa, Braverman yirukanwe ku mwanya we mu Gushyingo gushize, aho Minisitiri w’intebe yavuze ko yifuzaga gukorana n’ “itsinda ryunze ubumwe ryatanga impinduka iki gihugu gikeneye mu gihe kirekire”.