Sosiyete ya Leta ya Tanzania ikora ubwikorezi bwo mu kirere yatangaje ko indege yayo yari imaze amezi umunani ifatiriwe n’u Buholandi kubera umwenda wa miliyoni 165$ yarekuwe.

Sponsored Ad

Mu Ukuboza mu 2022 nibwo iyi ndege yafatiriwe n’u Buholandi kubera ideni Tanzania ibereyemo Ikigo cyo muri Suède cyayitsinze mu rubanza.

Ifatirwa ry’iyi ndege ryaturutse ku rubanza ikigo cyo muri Suède cyitwa ‘EcoEnergy Africa AB’ gifite umushinga w’uruganda rukora isukari mu gace ka Bagamoyo muri Tanzania cyatsinzemo Leta y’iki gihugu yari yacyambuye ibyangombwa by’ubutaka.

Nyuma yo gutsindwa urukiko rwategetse Leta ya Tanzania kwishyura miliyoni $165, gusa ntibyakorwa ari nabyo byavuyemo ifatirwa ry’iyi ndege.

Mu mpera z’iki cyumweru nibwo Umuvugizi wa Guverinoma ya Tanzania, Gerson Msigwa yatangaje ko babashije kugomboza iyi ndege ndetse ikaba yarageze mu gihugu k uwa 6 Nyakanga mu 2023.

Yavuze ko ubu bari mu myiteguro yo kureba uko iyi ndege yo mu bwoko bwa Airbus 220 yasubukura ingendo.