Irani ishimangira ko izatera igihugu cya Israel nikiramuka gishatse kuyihoreraho kubera igitero yayigabyeho ariko ntigitange umusaruro yifuzaga.

Sponsored Ad

Igisirikare cya Israel cyashwanyagurije mu kirere nyinshi muri drones za Iran zagabye ibitero mu ijoro ryo kuri uyu wa Gatandatu rishyira ku Cyumweru, aho Iran yatangaje ko iri kwihimura ku bitero by’iterabwoba byagabwe kuri ambasade yayo muri Syria bigashinjwa Israel.

Irani yagabye igitero kitari cyabaho ku butaka bwa Israel, iravuga ko Israel niyibeshya igashaka kubasubiza nayo, intambwe zikurikira zizaba zikomeye.

Umukuru w’igisirikare cya Irani Jenerali-Majoro Mohammad Bagheri, yabwiye televiziyo y’iki gihugu ko Israel igerageje kwihorera,igisubizo cya Irani cyaba “gikomeye cyane” gusumbya ibi bitero byo mw’ijoro ryakeye.

Irani iraburira kandi Leta Zunze Ubumwe za Amerika ko gushyigikira Israel mu gihe yashaka kwihorera byatuma ibigo bya Amerika nabyo biterwa.

Mbere y’aho,uhagarariye Irani muri ONU yamenyesheje ko ari uburenganzira bwayo bwo kwirwanaho nk’uko biri mu ngingo ya 51 y’iri shyirahamwe, kandi ko iki gihugu gifata ko “iyi nshingano…yarangiye”, inyuma y’igitero cyayo kuri Israel, ariko kandi bakaburira ko Israel itahirahira ngo ikore “irindi kosa”.

Abahanga babona ko iki gitero kitari bwigere kibaho - aho Irani itera ubutaka bwa Israel – kizatuma Israel nayo yihorera.

Hagati aho, nk’uko bivugwa na CNN yo muri Amerika,Perezida Joe Biden yamaze kubwira Minisitiri w’Intebe wa Israel Benjamin Netanyahu ko Amerika itazinjira mu gitero na kimwe kizakorwa kuri Irani.

Hagati aho, umutegetsi wa Israel yabwiye ikinyamakuru New York Times ko igitero icyo ari cyo cyose Israel yakora “izagikorana n’incuti zayo”.

Ni mu gihe Perezida Biden avuga ko Amerika yafashije Israel gusambura hafi amadrone 300 n’ibisasu bya misire byarashwe na Irani.

Ku ruhande rwe,Minisitiri w’Intebe wa Israel mw‘ijambo rye rya mbere yavuze nyuma y’iki gitero cyo mw’ijoro ryakeye, yijeje abanyagihugu ko igihugu cye “kizatsinda”.

Ati: “Twazitiye. Turazibira. Turi kumwe twese tuzatsinda”.

Israel irarahira ko igomba “kwihorera bikomeye” kuri iki gitero cya misile cya Irani cyo mw’ijoro ryakeye.

Igisirikare cya Israel hamwe na leta yayo y’intambara bikomeje kuganira kuri iki kibazo.

Ikintu gishoboka cyane ni uko Israel ishobora kurasa ibigo bya Irani byarasiweho ibi bisasu bya misile.

Iyi ishobora kuba intambara y’uruhererekane kuri ibi bihugu byombi kuko byiyemeje gusubizanya.

BBC