London: Abarenga ibihumbi 10 bashyigikiye Palestine bagiye kwigaragambya
Iyo myigaragambyo biteganijwe ko yitabirwa n’abantu barenga 100,000.
Ni imyigaragambyo imaze kumenyerwa muri icyo gihugu kuva intambara hagati ya Isiraheri n’umutwe wa Hamas wo muri Palestine yadutse mu kwezi gushize. Abantu barenga 100 bamaze gufatirwa muri iyo myigaragambyo bashinjwa gushyigikira imitwe itemewe mu Bwongereza no gukwinza imvugo z’urwango.
Byitezwe ko imyigaragambyo ya none ishobore gukara cyane dore ko ihuriranye n’umunsi wo kwibuka Abongereza baguye mu ntambara zitandukanye guhera mu ntambara ya mbere y’isi.
Ministiri w’intebe Rishi Sunak yasabye abigaragambya kubikora mu mahoro.
Laurence Taylor ukuriye itsinda ry’abapolisi ryoherejwe muri iyo myigarambyo yavuze ko iyi wikendi ishobora kubabera ikigeragezo gikomeye.
Usibye abashyigikiye Palestine, uyu mupolisi avuga ko hashobora kuboneka abandi bigaragambya bashyigikiye urundi ruhande bishobora gutuma haba uguhangana kw’abigaragambya bigateza urugomo n’imvururu.
Hari bamwe mu banyepolitike bari basabye ko iyi myigaragambyo ihagarikwa kubera umunsi wo kuzirikana abaguye ku rugamba wizihijwe mu Bwongereza kuru uyu wa gatandatu. Ministiri w’intebe Sunak yavuze ko ingaruka zose ari buzishyire ku muyobozi wa polisi mu mujyi wa Londres Mark Rowley wemeye ko iyo myigaragambyo ikomeza.
Umuyobozi wa polisi we yavuze ko kugeza ubu nta mpamvu ifatika ihari yatuma baburizamo iyo myigaragambyo.
IJWI RY’AMERIKA