Nyampinga w’isi wa 2016 ni Stephanie Del Valle watowe mu birori bikomeye byabereye i Washington D.C muri Leta zunze ubumwe za Amerika. Nyampinga w’u Rwanda 2016, Mutesi Jolly wari uhagarariye u Rwanda ku nshuro ya mbere akaba yaragerageje ukurikije abo bari bahanganye.
Mu rucyerera rwo kuri iki cyumweru tariki ya 18 Ukuboza uyu mwaka, mu nzu mberabyombi ya MGM National Harbor isaa saba z’ijoro nibwo habaga ibirori byo gutora Nyampinga uhiga abandi mu buranga ndetse no mu bwenge ku isi
Umukobwa ukomoka mu gihugu cya Puerto Rico witwa Stephanie Del Valle niwe wambitswe ikamba. Miss, Jolly Mutesi wari uhagarariye u Rwanda ku nshuro ya mbere ntiyabonetse mu bitwaye neza ari nayo mpamvu atashyizwe mu bagombaga guhatanira iryo kamba.
Ku nshuro ya 66 iri rushanwa riba ryari rihataniwe n’Abakobwa bagera ku 111 bavuye mu bihugu bitandukanye byo ku isi. Bamaze ukwezi kurenga batamberezwa ahantu hatandukanye ari nako barushanwa. Miss World 2016, ni irushanwa rikuru kurusha ayandi y’ubwiza ku isi ritegurwa n’Abongereza kuva mu 1951.
Stephanie Del Valle wabaye Miss World 2016, yagaragiwe n’ibisonga bibiri. igisonga cya mbere cyabaye Yaritza Reyes wo muri Dominican Republic igisonga cya kabiri kiba Natasha Mannuela wo muri Indonesia.
Mu gihe cyose Jolly Mutesi yamaze muri iri rushanwa yagaragaye muri 24 bafite ubwiza bufite intego. Kuva icyo gihe ntiyongeye kugaragara atsinda mu marushanwa mato mato ari nayo aha amahirwe menshi umukobwa mu guhatanira uwegukana iri kamba.
Natalia Short wo mu birwa bya Cook yatsinze agace ka Siporo, Jing Kong wo mu Bushinwa warushije abandi ibyo kwiyerekana mu ntambuko (model), Bayartsetseg Altangerel wo muri Mongolia yarushije abandi kwerekana impano ye, Catriona Gray wo muri Philippines we yarushije abandi gukundwa cyane ku mbuga nkoranyambaga.
Aba bane byahise binabaha itike yo guhatana muri 20 ba mbere batowemo Miss World.U Rwanda nibwo bwa mbere rwari ruhagarariwe muri iri rushanwa rikomeye kurusha andi abiri akomeye cyane y’ubwiza ku isi (Miss Universe na Miss Earth).
Stephanie Del Valle watsinze yambitswe ikamba na Mireia Lalaguna wo muri Espagne wari Miss World 2015. Gusa Umunyafurika waje ku mwanya wa hafi ni umwari Evelyn Thungu waje muri batanu ba mbere.
Amafoto yarenze uyu muhango: