CAN2017: Burkina Faso yegukanye umwanya wa gatatu ihigitse Ghana
Ikipe y’igihugu ya Burkina Faso yegukanye umwanya wa gatatu mu irushanwa ry’igikombe cya Afurika cya 2017, nyuma yo guhigika ikipe ya Ghana yahabwaga amahirwe yo kuzegukana iki gikombe.
Igitego 1 gusa cyatumye Burkina Faso irara ku mwanya wa gatatu mu gihe ikipe ya Ghana yabaye iya kane muri iri rushanwa.
Igitego cya Burkina Faso cyatsinzwe na rutahizamu Alain Traore usanzwe ukinira ikipe ya Kayserispor yo muri Turquie ku munota wa 89.
- Byari ibyishimo ku bakinnyi ba Burkina Faso
Abasore ba Ghana nka Jordan Ayew, Edward Agyemang Badu na Bernard Tekpetey bagerageje kubonera Ghana igitego ariko ntibabasha kubyaza umusaruro amahirwe bari babonye.
Aya makipe yahuriye ku mikino wo guhatanira umwanya wa gatatu nyuma yo gutsindwa imikino yayo ya ½. Muri icyo cyiciro, Burkina Faso yasezerewe na Misiri iyitsinze kuri penaliti 4-3 nyuma yo kunganya igitego 1-1 mu minota 120.
Ghana yo yasezerewe muri ½ itsinzwe na Cameroun ibitego 2-0.
Kuri iki Cyumweru nibwo hateganyijwe umukino wa nyuma w’iri rushanwa ryaberaga muri Gabon, Misiri icakirana na Cameroun, zigeze guhurira na none ku mukino wa nyuma mu 2008, Misiri igatsinda Cameroun igitego 1-0 ndetse inayitwara igikombe.
- Igitego 1 cya Burkina Faso cyatsinzwe na Alain Traoré (wambaye nimero 10)
