Luis Enrique utoza FC Barcelona yayisezeye ku mugaragaro
Umutoza Luis Enrique utoza ikipe ya FC Barcelona yo muri Espagne yasezeye ku buyobozi bw’ iyo kipe, abakinnyi n’ abakunzi bayo avuga ko batazakomezanya umwaka utaha w’imikino.
Luis Enrique w’ imyaka 47 yari amaze imyaka itatu atoza iyo kipe avuga ko bataba bari kumwe guhera muri Kanama 2017
NK’ uko bigaragara ku rukuta rwa Twitter rw’iyi kipe ku isaha ya saa yine n’iminota 58 z’umugoroba ku masaha ya hano mu Rwanda, tariki ya mbere Werurwe 2017, Ikipe ya FC Barcelone yagize iti "Inkuru ishyushye: Luis Enrique atangaje ko atazakomeza gutoza FC Barcelona guhera mu mwaka utaha w’imikino."
Kuri icyo cyemezo, Josep Maria Bartomeu, Perezida w’iyi kipe ahise avuga ko bagomba kubaha umwanzuro wa Luis, agize ati "Twemeye icyemezo cya Enrique, yatubereye umutoza w’agatangaza, harageze ngo asoze ishingano ze kandi binyuze mu nzira ziboneye.
Luis Enrique yatangiye gutoza ikipe ya FC Barcelone kuva mu mwaka wa 2014, ntiharatangazwa aho azerekera nyuma y’iki cyiciro cya 3 ari nacyo cya nyuma asigaje muri FC Barcelona. Ahesheje iyi kipe ibikombe 8, kandi hasigaye ibindi 3 agikinira bikizewe muri uyu mwaka w’imikino.