FA CUP: Manchester United irasezerewe, Arsenal itombora Manchester City muri 1/2
Nyuma y’uko Chelsea isezereye Manchester United, tombora ya 1/2 cy’igikombe cya FA Cup isize ikipe ya Arsenal igomba guhura na Machester City ni mu gihe ikipe ya Chelsea izahura na Tottenham.
Ni tombola yabaye muri iri joro ryo kuri uyu wa mbere tariki ya 13 Werurwe 2017, nyuma y’umukino wa 1/4 Chelsea yatsinzemo Manchester United 1-0 igahita inayisezerera.
Ni umukino ikipe ya Chelsea yasatiriye Manchester United cyane maze abasore nka Eden Hazard bagerageza uburyo bwinshi ariko umuzamu De Gea amubera ibamba.
Ku umunota wa 35 ikipe ya Manchester United yabonye ikarita itukura ihawe Ander Herrera ku ikosa yakoreye Hazard, bivuze ko iminota isigaye Manchester United yayikinnye ituzuye.
Ku umunota wa 51 ku ishoti yatereye inyuma y’urubuga rw’amahina Ngoro Kante yatsindiye Chelsea igitego cya mbere ari nacyo cyaje gutandukanya impande zombi Manchester United iba isezerewe mu irushanwa ityo, Chelsea iba igeze muri 1/2.
Imikino ya 1/2 iteganyijwe tariki ya 22 ndetse na 23 Mata 2017.