Abayobozi b’ibihugu bikomeye ku isi bashushanyijwe n’umunyabugeni mu masura y’impunzi zisabiriza(AMAFOTO)

Yanditwe na: Martin Munezero 15 June 2017 Yasuwe: 5961

Umuhanzi umwe yarahagurutse ati “kuri iyi Si nta wahazanye ibigega, abantu bose bazayisiga uko bayisanze”, dore ko n’Umunya Uganda, Semwanga uherutse gusasirwa amafaranga mu gituro bigoye kumenya niba hari icyo amumariye uyu munsi.

Mu mashusho adasanzwe, Umunya-Syria, Abdalla Al Omari yashushanyije abayobozi bakomeye ku Isi mu isura y’impunzi zibungana akarago zisabiriza. Mu icyo gihangano yafashe nka Minisitiri utaha mu nzu nziza i Nyarutarama, ku makaro adashobora gukandagiraho urushishi, amushushanya mu ishusho y’umuturage utagira n’urwara rwo kwishima; aho arambika umusaya, uvuga ntiyumvwe.

Ni igihangano Abdalla Al Omari yahanze nyuma yo kumara igihe mu Bubiligi aho yahunze avuye iwabo muri Syria ahari intambara imaze guhitana benshi.

Ni igihangano bitoroshye kugihanga, dore ko na we nubwo asanzwe abifitemo inararibonye byamutwaye amezi 19, kugirango yifashishe amarangi n’ibindi byamufashije kubishyira ahabona.

Hamwe yashushanyije Perezida wa Leta Zunze Ubumwe za Amerika, Donald Trump abungana akarago, umwana yamusunziriye ku rutugu, Perezida w’u Burusiya, Vladimir Putin afite icyapa gisaba, ubutumwa bugira buti “ Nyamuneka nimumfashe, Imana ibahe umugisha.”

Ibihango bye ntibigamije gusebya abayobozi b’Isi; ahubwo biributsa kugaragaza ubumuntu mu bikorwa byose.

REBA AMAFOTO HASI:

Angela Merkel mu bukene budasanzwe