Barcelona ishobora kwerekeza muri Premier League
Ikipe ya FC Barcelona ishobora gukina muri shampiyona y’Ubwongereza mu gihe intara ya Catalunya yaba yiyomoye ku gihugu cya Espagne nkuko amakuru dukesha ikinyamakuru The Mirror cyo mu Bwongereza.
Ku munsi w’ejo nibwo hazaba amatora ya Referendum ku baturage baturiye iyi ntara basaga miliyoni 7 aho niharamuka hemejwe ko iyi ntara yigenga ikipe ya FC Barcelona izahita yirukanwa muri La Liga nkuko byatangajwe n’iri shyirahamwe mu minsi ishize.
Minisitiri w’imikino mu ntara ya Catalunya Gerard Figueras yatangaje ko mu gihe byaba bibaye ngombwa ko Catalunya yigenga, amakipe 3 aturuka muri iyi ntara atabura aho akina cyane ko hari n’andi makipe akomoka mu bindi bihugu yemererwa gukina shampiyona mu gihugu bituranye.
Yagize ati “Ubwigenge nibuboneka amakipe 3 yo muri Catalunya FC Barcelona,Espagnol na Girona niyo azahitamo aho agomba gukina yaba muri Espagne,mu Butaliyani,mu Bufaransa no muri Premier League.Hari amakipe menshi akina mu bihugu byo hanze,sintekereza ko UEFA ibuza ikipe gukina muri shampiyona runaka .”
ikipe ya FC Barcelona n’ubuyobozi bwayo batangaje ko bifuza ko iyi ntara yakwigenga ndetse ko badatewe impungenge no kwerekeza mu yandi mashampiyona cyane ko babwiwe ko bazahura n’ingaruka zizaturuka kw’aya matora.