Burundi: Umugore wa Perezida Ndadaye wishwe yavuze akari ku mutima nyuma y’imyaka 24
Laurence Ndadaye umugore wa Perezida Melchior Ndadaye wabaye Perezida w’ u Burundi wishwe ashimuswe arasaba ko ababigizemo uruhare bose bahanwa.
Uyu mugore yavuze ko urubanza ku iyicwa ry’umugabo we rudakurikiranwa n’itsinda CVR.
Mu kiganiro cya mbere yahaye itangazamakuru kuva uwahoze ari Umukuru w’igihugu cy’ u Burundi Melchior NDADAYE yishwe, Laurence NDADAYE kuwa gatanu 20 Ukwakira 2017 yashyize ahabona bimwe mu byamubabaje inyuma y’urupfu rw’umugabo we ibyo bijyanye n’iperereza atazi aho ryadindiriye.
Kubona uyu mugore avuye muri icyo gihe cyo guceceka nyuma y’imyaka 24 umugabo wiwe yishwe ntibisobanura ko ntacyo yakoze. Laurence NDADAYE yabwiye abanyamakuru ko yagumye akurikiranira hafi iyo dosiye kandi ko ubutabera aribwo buyifite.
Asaba abarundi bose guhagurukura icyarimwe bagasaba ko uru rubanza ruburanishwa, kuko uwishwe ari umuyobozi bari baritoreye.