Kenya: Raila Odinga ntiyemera amajwi Perezida Kenyatta yagize
Umuyobozi utavuga rumwe n’ubutegetsi bwa Kenya, Raila Odinga, yavuze ko itora rya perezida ryabayemo uburiganya. Yabivuze mu itangazo rya mbere yavugiye ku mugaragaro kuva Uhuru Kenyatta atangajwe ko yatsinze amatora.
Mu ijambo ryari ritegerejwe cyane kuri televisiyo, Odinga yavuze ko abatavuga rumwe n’ubutegetsi bashobora gukomeza gukoresha uburyo bwose bwo kwamagana amajwi yavuye mu itora yise ko “ntacyo rivuze”, banyuze mu cyo yise mu buryo bwemewe n’amategeko.
Ntacyo yigeze avuga cyakora ku byo kuba yajyana amajwi atemera mu rukiko.
Yanenze akanama gashinzwe amatora agashinja guhimba imibare y’abitabiriye ayo matora.
Yananenze kandi Perezida Kenyatta avuga ko yihaye ubutegetsi.
Hamwe n’abakandida umunani bari ku rutonde rw’itora, Kenyatta yabonye hafi miliyoni zirindwi n’ibihumbi magana atanu z’amajwi, ni ukuvuga 98 ku ijana yose hamwe.
Bwana Kenyatta yegukanye amajwi 98% nyuma yaho Raila Odinga n’abayoboke be banze kwitabira ayo matora.
Perezida Uhuru Kenyatta yavuze ko ayo majwi yongeye kwerekana icyo abaturage bifuza.
Bwana Odinga kandi yavuze ko umutwe we wa politiki ushaka ko haba andi matora mashya ariko nta bindi bisobanuro yabitanzeho.
Amatora y’umukuru w’igihugu yabaye kuwa kane w’icyumweru gishize yari asubiwemo kubera ko ayabaye mu kwezi kwa munani agatsindwa na Perezida Uhuru Kenyatta yari yagizwe impfabusa n’urukiko rw’ikirenga.
BBC