Manchester City ikomeje inzira nyayo iyiganisha ku gikombe mu gihe Manchester United itorohewe(Amafoto)
Ikipe ya Manchester City ikomeje kwereka abakunzi b’umupira w’amaguru ndetse n’abakurikirana shampiyona y’Ubwongereza ko ifite gahunda yo gutwara shampiyona ya 2017-2018 cyane ko kuri iki cyumweru ibashije gutsinda Arsenal ibitego 3-1,mu gihe Chelsea yo itsinze Manchester United igitego 1-0.
Kuri iki cyumweru nibwo hari hategerejwe imikino 2 yari ikomeye aho ikipe ya Manchester City yakiriye Arsenal ku kibuga Etihad Stadium iyitsinda ibitego 3-1 byatsinzwe na Kevin de Bruyne ku munota wa 19,Sergio Aguero kuri penaliti itavuzweho rumwe ndetse Gabriel Jesus atsinda igitego cya 3 ku munota wa 74 ku mupira yaherejwe na David Silva wari waraririye mu gihe igitego kimwe rukumbi cya Arsenal cyatsinzwe na Alexandre Lacazette ku munota wa 65.
Undi mukino wahuje ikipe ya Chelsea FC yari yakiriye Manchester United aho yayitsinze igitego 1-0 igitego cyatsinzwe na Alvaro Morata ku munota wa 55.
Nyuma y’iyi mikino ikipe ya Mancheter City yongereye ikinyuranyo cy’amanota yarushaga Manchester United iyikurikiye dore ko kuri ubu iyirusha amanota 8 kuko ifite amanota 31 mu gihe Manchester United ifite 23 inganya na Tottenham yo yatsinze Crystal Palace 1-0 cyatsinzwe na Heung Min Son.
