Manchester City itsinze Chelsea ishimangira intambwe igana ku gikombe,Wenger aca agahigo kabi muri Arsenal [AMAFOTO]
Ku mukino wo kuri iki cyumweru wari witezwe na benshi muri shampiyona y’ubwongereza Premier League wahuzaga Manchester City na Chelsea urangiye ku ntsinzi ya Guardiola n’abahungu be bakomeje gushimangira intambwe ibageza ku gikombe cya shampiyona cy’uyu mwaka mu gihe Arsene Wenger yaciye agahigo kabi ko gutsindwa umukino wa kane wikurikiranya kuko yatsinzwe na Brighton ibitego 2-1.
Brighton yatsinze Arsenal Wenger akora amateka mabi
Manchester City yongeye gutsinda Chelsea igitego 1-0 muri uyu mwaka w’imikino cyatsinzwe na Bernardo Silva ku munota wa mbere w’igice cya kabiri dore ko Chelsea yakinnye umukibo wo kugarira igice cya mbere kikarangira ari 0-0.
Umutoza Pep Guardiola akomeje gushimangira ko uyu mwaka ari indashyikirwa kuko amaze gutsindwa umukino umwe gusa wa Liverpool mu gihe iyoboye urutonde rwa shampiyona n’amanota 78 aho irusha Liverpool ya 2 amanota 18.
Wenger ari mu mazi abira
Ku rundi ruhande ikipe ya Arsenal ntabwo yorohewe ku kibuga cya Brighton kuko yahatsindiwe ibitego 2-1,uba umukino wa 4 Wenger atakaje yikurikiranya ibintu yaherukaga mu mwaka wa 2002.
Wenger uri mu bihe bibi ndetse watangiye kumanikirwa ibyapa bimwirukana n’abafana ba Arsenal ashobora gukora agahigo kabi ko kumara imikino 5 adatsinda kaherukaga mu myaka 42 ishize, ubwo azaba ahura na AC Milan muri UEFA Europa League ku wa Kanew’icyumweru gitaha.
Abafana ba Arsenal ntibagishaka ko Wenger abatoza
Bikomeje guhwihwiswa ko uyu mutoza yabwiwe n’ubuyobozi bwa Arsenal ko uyu ari wo mwaka we wa nyuma nk’umutoza wa Arsenal akaba ariyo mpamvu ikipe imeze nabi cyane.
Muri Espagne hakinwaga umukino ukomeye wahuje ikipe ya FC Barcelona yari yakiriye Atletico Madrid igitego 1-0 cyatsinzwe na Lionel Messi kuri Coup Franc ndetse kimuhesha kugeza ku bitego 600 mu mateka ye nk’umukinnyi, aho ndetse bahise barusha ikipe ya Atletico Madrid ibakurikiye muri La Liga amanota 8.