Perezida Magufuli yavuze uburyo bapimye ipapayi n’ihene nabyo bakabisangamo Coronavirus
Magufuli yabivuze kuri iki cyumweru mu gikorwa cyabereye ahitwa Chato mu Majyaruguru ashyira Uburengerazuba bwa Tanzania. Yavuze ko habayeho amakosa ya tekiniki mu gukora ibikoresho bipima Coronavirus.
Tanzania inengwa guhisha imibare y’abantu banduye Coronavirus no kugenda biguru ntege mu kuyirwanya.
Perezida Magufuli yavuze ko yategetse inzego z’umutekano za Tanzania kugenzura ubuziranenge bw’ibikoresho bipima Coronavirus. Ibi ngo byatumye mu buryo bwa tombola hafatwa ibipimo ku bindi bintu bitari abantu birimo ihene, intama n’ipapayi, ariko bihabwa amazina y’abantu n’imyaka.
Ibi bipimo ngo byajyanwe muri Laboratwari ya Tanzania ngo bisuzumwe Coronavirus, ariko abayikoramo ntibari bazi aho byavanywe. Ibipimo byo mu ipapayi n’ihene byasanzwemo Covid-19.
Magufuli yakomeje avuga ko ‘bishoboka cyane ko hari abantu basanganwa coronavirus kandi mu by’ukuri batarayanduye’, bityo hakwiye iperereza kuri ibyo bikoresho.
Ati “Hari ikintu kirimo kubaho. Nabivuze na mbere, ntabwo dukwiye kwemera ko ubufasha bwose ari bwiza ku gihugu cyacu”.
Kugeza kuri iki cyumweru Tanzania yari ifite abantu 480 banduye Coronavirus, 17 yarabahitanye. Ibikorwa mu mujyi wa Dar es Salaam birakomeje.
Magufuli kandi yatangaje ko yagiranye ibiganiro na Guverinoma ya Madagascar bijyanye no kuba iki gihugu cyaha Tanzania umuti gakondo kivuga ko cyavumbuye uvura COVID-19.
Yagize ati “Maze iminsi mu biganiro na Madagascar. Bavuga ko bavumbuye umuti wa COVID-19. Tuzohereza indege kugira ngo ijye kuwuzana muri Tanzania kugira ngo abanya-Tanzania bawukoreshe.”
Perezida wa Madagascar, Andry Rajoelina, yavuze ko uyu muti ukoze mu byatsi, uvura abarwayi ba COVID-19 bagakira neza.