Abafana ba Liverpool bateye umugongo Covid-19 birara mu mihanda ku bwinshi bishimira igikombe cya shampiyona
Birengagije amategeko yo kuguma mu rugo kubera coronavirus, abafana ibihumbi ba Liverpool bahise bajya kwishimira kuri stade y’ikipe yabo ya Anfield.
Nkuko byagaragajwe n’amafoto y’ibinyamakuru bitandukanye,abafana ba Liverpool byabanze mu nda niko kwirara ku kibuga Anfield bambaye imituku ndetse bafite imyotsi y’umutuku bishimira iki gikombe bari bategereje igihe kinini.
Abafana ba Liverpool bazwiho umuhate mu gufana ku kibuga ndetse ngo bakunda iyi kipe yabo bidasanzwe aho buri wese ugiye gukinira ku kibuga cy’iyi kipe agenda yikandagira kubera umurindi wabo n’urusaku rudasanzwe bagira.
Ibinyamakuru byavuze ko,ibihumbi by’abafana ba Liverpool bahise bajya kuri Anfield kwishimira iyo ntsinzi nta bwoba bw’icyorezo.
Ikipe ya Chelsea yaraye itsinze Manchester City ibitego 2-1 bishimangira ko Liverpool itwaye iki gikombe cya shampiyona y’Ubwongereza kuko iyirusha amanota 23 yose kandi hasigaye 21 gusa yo gukinira.
Kunanirwa gutsinda kwa City byahise bisobanura ko gushyikira Liverpool mu manota bitagishobotse.
Iki ni igikombe cya 19 Liverpool yegukanye, n’icya mbere itwaye kuva mu 1990.
Nyuma y’amezi atatu Premier League ihagaritswe byemejwe ko isubukura muri uku kwezi, ariko nanone mu buryo budasanzwe, aho imikino iri kuba nta bafana.
Uko bimeze ubu, bisa n’ibidashoboka gukora igikorwa gisanzwe gihuza abantu benshi cyahuriramo abafana, kwishimira igikombe birasa n’ibitagenda uko bisanzwe.
Mu buryo nanone budasanzwe, Liverpool izasubira mu kibuga ijya gusura Manchester City yatsinzwe ikabahesha igikombe.
Nyuma yo gutsindwa na Chelsea, umutoza Pep Guardiola wa City yashimiye Liverpool ku kwegukana igikombe.
Liverpool ubu ifite amanota 86, n’umuhigo w’imikino 28 yatsinze, kunganya kabiri no gutsindwa rimwe mu mikino 31.
Iciye umuhigo kandi wo gutwara igikombe irusha ikipe iyikurikiye amanota 25, ibitarigeze bibaho mbere mu mateka y’iyi shampiyona.
Nta bundi byabayeho kandi muri iki kiciro cya mbere mu Bwongereza ko ikipe itwara igikombe habura imikino irindwi ngo irangire.
