Usengimana Danny yatangaje igihe azakorera ubukwe
Ku munsi w’ejo tariki ya 21 Nzeri 2020, ni bwo hasohitse urupapuro ruteguza abantu ubukwe bwa Danny Usengemana(Save the Date) n’uyu mukunzi we bivugwa ko aba mu gihugu cya Canada.
Iyi nteguza ivuga ko ubu bukwe buzaba mu kwezi gutaha, tariki ya 8 Ukwakira 2020, bukazabera Kicukiro mu murenge wa Niboye.
Danny Usengimana agiye gukora ubukwe na Francine nyuma y’uko yatandukanye n’uwahoze ari umukunzi we akamusimbuza uyu munyarwandakazi uba muri Canada.
Usengimana w’imyaka 24 y’amavuko, yatangiriye umupira w’amaguru mu makipe y’abato ya Gasabo United na SEC Academy. Mu mwaka w’imikino wa 2014/15 yagiye mu Isonga FC, ayikinira umwaka umwe, aho yigaragaje ahita agurwa na Police FC.
Usengimana yahiriwe n’umwaka wa mbere w’imikino aba umukinnyi watsinze ibitego byinshi muri Shampiyona ya 2015/16 ndetse no muri shampiyona ya 2016/17.
Nyuma yo kugira ibihe byiza muri Police FC, uyu rutahizamu wari waratangiye guhamagarwa mu ikipe y’Igihugu guhera muri CHAN 2016, yabengutswe na Singida United yo muri Tanzania, ayikinira umwaka umwe.
Muri Kanama 2018, Usengimana Danny yerekeje muri Tersana Sporting Club yo mu Misiri, ariko ntiyahatinze kuko muri Gashyantare 2019 yerekanywe nk’umukinnyi mushya wa APR FC akinira kugeza ubu. Mu mwaka ushize w’imikino yatwaranye nayo igikombe cya shampiyona, ayitsindira ibitego 11.
