Rutahizamu Camara wari utegerejwe na Rayon Sports yasanganwe Covid-19
Umuyobozi mushya wa Rayon Sports,Uwayezu Jean Fidele,yari yabwiye abanyamakuru ko Moussa Camara agomba kugera mu Rwanda mu mpera z’icyumweru gishize ariko ntiyabashije kuza kubera Covid-19.
Moussa Camara wigeze kunyura muri Rayon Sports mu mwaka w’imikino wa 2016/2017,byavugwaga ko yari kugera mu Rwanda kuri uyu wa Gatandatu tariki 24 Ukwakira 2020 saa tatu z’ijoro.
Amakuru avuga ko Camara yamaze kumvikana na Rayon Sports agomba gushyira umukono ku masezerano akigera mu Rwanda.
Mbere yo kuva muri Rayon Sports, uyu rutahizamu ukomoka muri Mali yasize ayifashije gutwara igikombe cya Shampiyona cya 2017. Uwo mwaka yayitsindiye ibitego 10 mu mikino 19.
Yahise yerekeza muri Ismaily Sporting Club yo mu Misiri aguzwe ibihumbi mirongo itanu by’Amadolari ya Amerika (50.000$).
Muri 2018, Camara yerekeje muri MO Béjaïa yo muri Algeria, ayimaramo umwaka umwe. Muri 2020 yasinyiye Sohar SC yo muri Oman ari nayo yari agikinira.
Moussa Camara nagera mu Rwanda aziyongera ku bandi bakinnyi b’abanyamahanga Rayon Sports yamaze kugura harimo Mannasseh Mutatu wavuye muri Gasogi United na Jean Vital Ourega ukina mu kibuga hagati Rayon Sports yatijwe na TP Mazembe.