Print

Abakandida bahatanye na Museveni ku butegetsi batangiye guhagarika kwiyamamaza kubera ifungwa rya Bobi Wine

Yanditwe na: Dusingizimana Remy 19 November 2020 Yasuwe: 1620

Bobi Wine yafunzwe kuwa Kabiri,bitera imvururu muri Kampala zimaze kugwamo abagera ku 8 abandi benshi barakomereka.

Umukandida ku mwanya wa Perezida wa Uganda, Gen Muntu wahoze mu gisirikare mbere yo gusubizwa mu buzima busanzwe, akinjira mu bikorwa bya politiki yemeje ko ahagaritse kwiyamamaza kubera ifungwa rya bagenzi be.

Abinyujije kuri twitter, Gen Muntu yasabye ko Robert Kyagulanyi uzwi nka Bobi Wine arekurwa hamwe na Patrick Amuriat.

Abakandida bombi batawe muri yombi ubwo bari mu bikorwa byo kwiyamamaza. Ifatwa rya Bobi Wine ryateje imyigaragambyo mu gihugu yatumye abantu umunani bapfa nk’uko umuvugizi wa Polisi ya Uganda abivuga.

Kyagulanyi yafungiwe mu gace ka Luuka, yajyanywe igitaraganya akuwe mu modoka ye. Arashinjwa guteranyiriza hamwe imbaga y’abantu barenga 200 bitandukanye n’amabwiriza yo kwirinda covid-19; aho mu bikorwa byo kwiyamamaza umukandida atagomba kurenza abantu 200 bitabiriye.

Afungiye muri gereza yo mu gace kitwa Nalufenya yamenyekanye cyane mu gufungirwamo abakora iterabwoba bitewe n’iyica rubozo bakorerwaga.

Umuyobozi wa Polisi muri Kampala, Moses Kefeero, yavuze ko Bobi Wine yari yarenze ku mabwiriza yo kwirinda Coronavirus muri iki gihe cy’amatora.

Ati "Akomeje kwica amahame yo kwiyamamaza muri iki gihe cya Coronavirus, yafashwe kugira ngo agire ibyo abazwa.

Ntabwo twakwicara ngo turebere abanyapolitiki bashyira ubuzima bw’Abanya-Uganda mu kaga."