Print

Euro 2020: Amakipe y’ibigugu agiye gucakirana mu mpera z’iki cyumweru

Yanditwe na: Dusingizimana Remy 18 June 2021 Yasuwe: 1953

Nyuma y’icyumweru kimwe ritangiye, irushanwa rya EURO 2020 rihuza amakipe y’ibihugu 24 akomeye i Burayi, rigeze mu mikino y’umunsi wa kabiri mu matsinda ndetse amakipe amwe yatangiye gukatisha itike ya 1/8.

EURO 2020 iri kuba ku nshuro ya 16 kuva tariki ya 11 Kamena, izasozwa tariki ya 11 Nyakanga 2021.

Impera z’iki cyumweru zitegerejwemo imikino isoza umunsi wa kabiri mu matsinda, izarangira ku wa Gatandatu mu gihe ku Cyumweru hazatangira iy’umunsi wa gatatu.

Bivuze ko guhera kuri uyu wa Gatanu kugeza ku Cyumweru, hazaba imikino umunani yose izerekanwa iri kuba kuri shene ya World Football ya StarTimes no kuri application yayo ya StarTimes ON.

Imikino iteganyijwe kuri uyu wa Gatanu

Mu itsinda D, u Bwongereza burahura na Ecosse mu mukino ubera kuri Stade Wembley guhera saa Tatu z’ijoro.

U Bwongereza bwatsinze Croatia igitego 1-0 ku munsi wa mbere mu gihe Ecosse yatsinzwe na Repubulika ya Tchèque ibitego 2-0.

Undi mukino uteganyijwe kuri uyu wa Gatanu muri iryo tsinda, urahuza Croatia na Repubulika ya Tchèque guhera saa Kumi n’ebyiri z’amanywa mu gihe guhera saa Cyenda hakinwa umukino wo mu itsinda E uhuza Suède na Slovakia.

Ku wa Gatandatu

Ku wa Gatandatu hateganyijwe imikino yo mu itsinda F rifatwa nk’iry’urupfu, aho Portugal izakina n’u Budage guhera saa Kumi n’ebyiri z’umugoroba mu mukino uzerekanwa kuri ST World Football.

Portugal yatangiye itsinda Hongrie ibitego 3-0, ibifashijwemo na Raphael Guerreiro na Cristiano Ronaldo winjije ibitego bibiri, akaba umukinnyi wa mbere umaze kwinjiza byinshi mu mateka y’iri rushanwa kuko yujuje 11.

U Budage bwo bwari bwatsinzwe n’u Bufaransa igitego 1-0, ariko iyi kipe irimo abakinnyi icyenda batwaye UEFA Champions League mu mezi icyenda ashize (Neuer, Müller, Gnabry, Goretzka, Joshua Kimmich, na Niklas Süle ba Bayern Munich; Havertz, Werner na Antonio Rüdiger ba Chelsea), iracyafite icyizere cyo kurenga itsinda.

Kuri uwo munsi kandi, u Bufaransa buzahura na Hongrie guhera saa Cyenda mu mukino ushobora kubufasha kuyobora itsinda F. Undi mukino uteganyijwe ku wa Gatandatu uzahuza Espagne na Pologne guhera saa Tatu z’ijoro mu itsinda E.

Ku Cyumweru

U Butaliyani bwabaye igihugu cya mbere cyabonye itike ya 1/8 mu irushanwa ry’uyu mwaka ubwo bwatsindaga u Busuwisi ibitego 3-0.

Gusa, Pays de Galles yatsinze Turikiya ibitego 2-0, na yo bizahura ku Cyumweru saa Kumi n’ebyiri, ishaka kubona itike yo kurenga itsinda A kuko ifite amanota ane.

Undi mukino wo muri iryo tsinda, uzahuza u Busuwisi na Turikiya guhera saa Mbiri n’iminota 20.