Cristiano Ronaldo yasohokanye n’umuryango we mu rwego rwo kwimara agahinda yatewe na Euro 2020
Nyuma yo kuva muri Euro 2020 atarenze umutaru we na bagenzi be bo muri Portugal,Cristiano Ronaldo yanze guheranwa n’agahinda asohokana n’umukunzi we ndetse n’abana be bose ku mazi ahitwa Majorca muri Espagne.
Uyu munyabigwi mu mupira w’amaguru,yashyize hanze ifoto ari kumwe n’umukunzi we Georgina Rodriguez n’abana be Cristiano Jr, Eva, Mateo na Alana Martina ku mazi y’ahitwa Pollensa mu majyaruguru ya Majorca.
Iyi foto yayiherekeje n’amagambo agira ati “Nicyo gihe cyo kuruhuka n’abo nkunda.”
Ronaldo wari wakoze ibishoboka byose ngo Portugal ive mu itsinda F ryari iry’urupfu muri Euro 2020,yasezerewe muri 1/16 n’Ububiligi ku gitego 1-0.
Icyakora nubwo Portugal yasezerewe,we yavuye mu irushanwa atsinze ibitego 5 ndetse kugeza ubu ntawe uramurusha ahubwo anganya na Patrick Schick wa Czech Republic nawe wavuye mu irushanwa.
Harry kane w’Ubwongereza ukiri mu irushanwa,niwe ushobora kumurengaho kuko ubu afite ibitego 3.
Ubwato bwitwa Azimut Grande Ronaldo yasohokanyemo n’umuryango we, bivugwa ko yabuguze muri Kamena umwaka ushize bufite ibyumba bisaga 6.
Cristiano w’imyaka 36 n’umukunzi we Georgina w’imyaka 27 bari kuba mu nzu bakodesheje mu majyaruguru ya Majorca mu rwego rwo kuruhuka.
