Abantu 9 bahitanwe na Covid-19 kuri uyu wa Gatandatu buzuza abantu 90 bapfuye mu cyumweru kimwe mu Rwanda
Abapfuye kuri uyu wa Gatandatu barimo abagore batandatu, umwe w’imyaka 81 w’i Huye, ab’i Kigali barimo uw’imyaka 81 na 65, aba 80 na 76 b’i Karongi n’uwa 65 w’i Musanze. Abandi bapfuye ni abagabo batatu barimo uw’imyaka 88 w’i Musanze, uwa 49 w’i Kigali n’undi wa 39 w’i Huye.
Kuva iki cyorezo cyagera mu gihugu, abo kimaze guhitana ni 727. Ku rundi ruhande, abarembye nabo bakomeje kwiyongera nk’aho mu minsi irindwi ishize, 252 bashyizwe mu bitaro barimo 35 bo kuri uyu wa Gatandatu.
Umujyi wa Kigali ni wo ukomeje kugaragaramo ubwandu buri hejuru aho nibura mu bantu ibihumbi 100, usangamo 367 banduye mu gihe mu tundi turere aba ari 47 naho mu gihugu muri rusange ari 78.
Igipimo cy’ubwandu mu minsi irindwi ishize cyari kuri 6,8% mu gihe kuri uyu wa Gatandatu cyari kuri 4,4%.
Kuri uyu wa Gatandatu, abakingiwe Covid-19 bahawe dose ya mbere ni 2.205 mu gihe abamaze gukingirwa neza (bahawe dose ebyiri) ari 425.387.
Minisiteri y’Ubuzima yatangaje ko mu minsi irindwi ishize ubwandu bw’icyorezo cya COVID-19 mu Rwanda hose bwari ku kigero cya 78/100,000 hagendewe ku bipimo byafashwe muri iyo minsi byagaragaje ubwiyongere budasanzwe aho buri munsi hagaragaraga abarwayi bashya batari munsi ya 900.
Ubwandu bushya bwabonetse buri ku kigero cya 367/100,000 muri Kigali na 47/100,000 mu bindi bice by’Igihugu.
