Print

Abantu 16 bahitanwe na Covid-19 mu Rwanda abandi 496 barayandura

Yanditwe na: Dusingizimana Remy 19 August 2021 Yasuwe: 745

Minisiteri y’Ubuzima yatangaje ko kuri uyu wa Kane,COVID-19 yahitanye abantu 16 batumye abamaze gupfa bagera kuri 996 mu #Rwanda. Abapfuye n’abagore 8 n’abagabo 8.

Abarwayi bashya ni 496 babonetse mu bipimo 11,354. Ni mu gihe abarwayi 8 ari bo basezerewe na ho abandi 22 bahabqa ibitaro. Abakingiwe ni 8,171 bose hamwe baba 969,734.

Inama y’Abaminisitiri yaraye iteranye yashimiye Abaturarwanda uruhare rwabo muri uru rugamba rwo kurwanya iki cyorezo, ikaba ibasaba kwitabira kwikingiza kuko inkingo zigenda zirushaho kuboneka, ndetse no kwisuzumisha kenshi kugira ngo bagabanye ikwirakwira rya COVID-19.

Inzego z’ubuzima ziraburira abaturarwanda kwitwararika kuko mu Gihugu hageze ubwoko bwa COVID-19 yihinduranyije bwitwa Delta bugize hafi 60% y’ubwandu bushya, bukaba bwandura vuba kandi bugatuma abantu banaremba vuba ndetse bamwe bakagira n’ibyago byinshi byo kubura ubuzima.

Ku wa 11 Kanama 2021, Guverinoma y’u Rwanda yafashe ingamba nshya zijyanye no kwirinda COVID-19 zirimo ko ingendo zibujijwe guhera saa mbiri z’ijoro (8:00 PM) kugeza saa kumi za mugitondo (4:00 AM). Ibikorwa byose byemerewe gukomeza bizajya bifunga saa moya z’ijoro (7:00 FM).

Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n’isabune cyangwa alukolo yabugenewe.

Mu gitondo cyo kuri uyu wa Kane u Rwanda rwakiriye doze z’inkingo 200,000 zo mu bwoko bwa Sinopharm rwagenewe na Repubulika y’Abaturage y’u Bushinwa. Ambasaderi w’u Bushinwa mu Rwanda Rao Hongwei ni we washyikirije Minisitiri w’Ubuzima Dr.Ngamije Daniel izo nkingo.

Izi nkingo zije zikurikira izindi zatanzwe na Leta Zunze Ubumwe z’Amerika (USA) u Rwanda rwakiriye icyiciro cyazo cya mbere ku mugoroba wo ku wa Gatatu.

Minisitiri w’Ubuzima Dr Daniel Ngamije yashimye Leta y’u Bushinwa ku musanzu itanze mu rugamba rwo guhashya icyorezo cya COVID-19 ashima kandi n’ubufatanye bw’ibindi bihugu mu guhangana n’icyorezo cya COVID-19.

Yagize ati: “Iyi nkunga ni umusanzu w’ingirakamaro mu bikorwa byo gukingira u Rwanda rukomeje hibandwa cyane ku byiciro byibasiwe cyane mu gihugu hose.”

Minisiteri y’Ubuzima ivuga ko izo nkingo zigiye kwifashishwa mu gukingira abaturage bo mu Turere umunani tugaragaramo ubwandu bwinshi bwa COVID-19 kurusha utundi.

Ambasaderi w’ u Bushinwa mu Rwanda Rao Hongwei, yavuze ko iyi nkunga y’inkingo u Bushinwa buhaye u Rwanda ishimangira imibanire myiza ibi bihugu bifitanye, ashimangira ko u Bushinwa bushyigikiye ubushake Leta y’u Rwanda yagaragaje mu guhangana n’icyorezo cya COVID-19.

Abamaze gukingirwa mu Rwanda bagera hafi kuri miliyoni imwe, muri bo, harimo abaza imbere mu kurwanya COVID-19 n’abafite ibyago byo kuzahazwa nayo kurusha abandi.

Guverinoma y’u Rwanda irashima by’umwihariko abafatanyabikorwa barimo ibihugu n’imiryango itandukanye bakomeje gutanga inkunga y’inkingo z’inyongera.