Abantu 5 bahitanwe na Covid-19 mu Rwanda abandi 415 barayandura
Abantu bapfuye bahitanwe n’iki cyorezo ni 5, mu bitaro hasezererwa 7. Abakingiwe uyu munsi ni 31,949.Abantu bahawe urukingo rwa mbere mu Rwanda bamaze kurenga miliyoni.
Ikigo cy’Igihugu cy’Ubuzima, RBC, cyatangaje ko Abanyarwanda bafite imyaka iri hejuru ya 18, bemerewe guhabwa urukingo rwa Covid-19 kuva kuri uyu wa Mbere tariki ya 23 Kanama uyu mwaka.
Ubusanzwe abantu bakuze n’abarwaye indwara zidakira, nibo bari bemerewe guhabwa urukingo rwa Covid-19 na cyane ko ibyo byiciro byombi biri mu bifite ibyago byo kuzahazwa n’icyorezo cya Covid-19.
Kuba abantu bose barengeje imyaka 18 bemerewe kwikingiza, biratanga icyizere ko u Rwanda rushobora kugera ku ntego rwihaye y’uko ruzakingira 30% by’abaturage barwo bitarenze uyu mwaka.
U Rwanda kandi rufite intego yo gukingira 60% by’abaturage barwo bitarenze Kamena umwaka utaha, ku buryo ibi bizaruha ubwirinzi bwo guhashya icyorezo cya Covid-19 burundu.
