Abayoboye Rayon Sports n’abayifite bahuje imbaraga mu kuyisubiza igitinyiro
Uyu munsi Komite ya Rayon Sports yongeye guhuriza hamwe abayiyoboye batangira urugendo rwo kwiyunga no guhuriza hamwe imbaraga mu kubaka Rayon Sports ikomeye kandi itwara ibikombe.
Mu guhamya intambwe ikomeye igana ku bwiyunge, bamwe mu bayoboye Rayon Sports batacanaga uwaka mu minsi ishize bemeye kwicarana baganira ku mishinga yo kubaka iyi kipe ibahuza.
Ku ruhande rwa komite nyobozi ya Rayon Sports,iyi nama yitabiriwe na Uwayezu Jean Fidele, Perezida wa Rayon Sports ndetse na Olivier Ndahiro, umubitsi wayo.
Abandi bari muri iyi nama harimo abagiye bayobora Rayon Sports mu bihe bitandukanye haba ababaye ba Perezida, Visi Perezida, ababaye ababitsi , abanyamabanga ndetse n’abajyanama mu bihe bitandukanye.
Muhirwa Prosper wabaye Visi Perezida wa Rayon Sports, Murenzi Abdallah bakunda kwita Mayor wabaye Perezida wa Rayon Sports, Munyakazi Sadate wabaye Perezida wa Rayon Sports, Rutagambwa Martin wabaye Visi Perezida wa Rayon Sports, Ntampaka Theogene wabaye Perezida wa Rayon Sports, Maitre Zitoni wabaye umunyamategeko wa Rayon Sports, Muhire Jean Paul wabaye Visi Perezida wa Rayon Sports ni bamwe mu bari bitabiriye iyi nama.
Aya makuru dukesha umunyamakuru wa B&B FM UMWEZI aravuga ko abarimo Martin Rutagambwa, Prosper Muhirwa, Sadate Munyakazi n’abandi batandukanyebayoboye iyi kipe bari muri iyi nama yayobowe n’umuyobozi wa Rayon Sports Jean Fidèle Uwayezu.
Abari mu nama bateranyije agera kuri Miliyoni 10, Munyakazi Sadate we yiyemeje ko azagura rutahizamu ukomeye ndetse icyo azasaba cyose azagitanga.
Aba bihaye gahunda yo gukomeza kuganira no kwegera abandi bakunzi b’ikipe ya Rayon Sports bakaba bayifasha.
Rayon Sports iteganya kongeramo abakinnyi 6 byibura bakomeye (Ubu ifite muri rusange abakinnyi 19).
Umutoza Djuma Masoud wari warwaye yarorohewe ubu vuba barateganya gusubukura imyitozo.
Nyuma yo kugarura umutoza Masudi Juma,Rayon Sports yaguze abakinnyi barimo Muvandimwe JMV,Byumvuhore Tresor na Mugisha Francois uzwi nka Master.Kugeza ubu iri gushaka abakinnyi bakomeye bo hanze y’u Rwanda ihereye kuri Muzamiru Mutyaba ukinira Express FC.
Muri iyi minsi,abafana ba Rayon Sports bari kwikusanya ngo bafashe ikipe kugura abakinnyi nyuma yo gukusanya hafi Miliyoni eshatu (2.850.000 Frw) mu minsi ibiri ngo hishyurwe umwenda ikipe yabo yari ibereyemo Nishimwe Blaise (1.420.000 Frw).
Comments
koko 30 August 2021
Nimugerageze murebe KO Rayon yakongera kuba gitinyiro,ikindi umupira wo mu Rwanda ukongera ugasusuruka.