Print

Burundi: Francine Niyonsaba yaciye agahigo ku isi mu kwiruka 2000m Perezida amwifuriza gutera imbere nk’umuzinga

Yanditwe na: Dusingizimana Remy 15 September 2021 Yasuwe: 1118

Umurundikazi Francine Niyonsaba yanditse amateka mashya mu kwiruka metero 2000 mu irushanwa Continental Tour Gold ryaraye ribereye i Zagreb mu gihugu cya Croatia.

Niyonsaba yaje ku mwanya wa mbere akoresheje iminota itanu n’amasegonda 21.56,akuraho agahigo ka Genzebe Dibaba yaherukaga mu gusiganwa mu kibuga gifunze (indoors) mu 2017, akaba yamusize amasegonda abiri.

Nyuma yo kwegukana umudari w’ifeza kw’isi no muri Olempike mu gusiganwa metero 800, Niyonsaba ni umwe mu biruka batari bake babujijwe kurushanwa kuri metero ziri hagati ya 400 na 1.600 kubera urugero rw’umusemburo ya testosterone ruri hejuru.

Uyu mukinnyi w’imyaka 28 avuga ko yahisemo gukomeza amarushanwa kugira ngo abere abandi urugero.

Uyu ari mu bakinnyi bategetswe guhindura ibirometero bagomba guhatanamo n’urwego mpuzamahanga rushinzwe imikino ngororamubiri muri 2019.Niyonsaba ntacyo yabaye kuko ubu ahagaze neza mu marushanwa yo ku ntera ndende.

Akimara gutsinda, Niyonsaba yagize ati: "Ndumva mfite umunezero udasanzwe. Si nari nzi ko nshobora kwandika amateka nk’aya kw’isi yose, kuko ni bwo bwa mbere nari nje hano. Naje hano gukora ibyo ngomba gukora".

"Nabikoze. Ni byiza kandi biraryoshye. Nshimiye abantu bose baje kudutera imbaraga".

Aya mateka mashya yanditse, yakuyeho undi muhigo w’umunya Ireland Sonia O’Sullivan yari yakoze mu marushanwa abera hanze mu 1994.Ibi Niyonasaba abigezeho hashize icyumweru kimwe gusa atsindiye igikombe mu gusiganwa kuri metero 5000 mu marushanwa ya Diamond League yabereye i Zurich mu Busuwisi.

Mu mikino ya Olempike iheruka kubera i Tokyo mu Buyapani, yarangijeku mwanya wa gatanu mu irushanwa rya nyuma (finale) kuri metero 10.000, ariko mbere y’aho akaba yari yakuwe mu irushanwa rya metero 5000 ashinjwe ko yaciye mu nzira itari iye.

Yaherukaga kandi kuba umukinnyi wa gatanu ku isi wiruka cyane muri metero 3000 mu rwego rw’abagore/abakobwa.

Gusiganwa kuri metero 2000 ntibiba mu mikino za Olempike cyangwa mu marushanwa mpuzamahanga (World Championships), ariko bikunze kuba mu marushanwa asanzwe yo gusiganwa.

Nyuma yo guca aka gahigo ndetse agatera ishema u Burundi na Afrika muri rusange,Perezida w’u Burundi,Evariste Ndayishimiye yanditse kuri Twitter ati "Kw’izina ry’Abarundi bose no kw’izina ryanje, ndakeje Umwigeme Francine Niyonsaba kw’iteka ridasanzwe amaze imisi atera Uburundi. Imana ibandanye imuhezagira agume atera imbere nk’umuzinga."



Niyonsaba akomeje gukora amateka mu kwiruka metero ndende