Print

Ombolenga agiye kumara ukwezi kose adakinira APR FC

Yanditwe na: Dusingizimana Remy 14 October 2021 Yasuwe: 769

Omborenga Fitina, umunyarwanda ukina ku ruhande rw’iburyo yugarira muri APR FC, agiye kumara ibyumweru 4,atagaragara mu kibuga kubera imvune y’akagombambari yagiriye mu mukino, Amavubi yatsinzwemo na Uganda 1-0,kuwa 07 Ukwakira 2021.

Nyuma yo kugirira imvune muri uwo mukino Ombolenga yitaweho n’abaganga basanga yaragize ikibazo mu kagombambari ahabwa ibyumweru bine binatumye atazagaragara mu mukino ikipe ya APR FC izakina na Etoile Du Sahel yo muri Tunisia.

Ku gicamunsi cyo kuri uyu wa Gatatu umuyobozi wa APR FC yasuye iyi kipe mu myitozo yakoraga irimo kwitegura imikino ya CAF Champions League agira ubutumwa abagenera mbere ko kwakira ikipe ya Étoile du Sahel.

Lt Gen Mubarakh Muganga wakurikiranye imyitozo ya APR FC yaberaga kuri Sitade ya Kigali i Nyamirambo akaba ari naho umukino uzabera kuri uyu wa Gatandatu.

Nyuma y’imyitozo yagize ubutumwa aganera abakinnyi ndetse n’abandi babarizwa mu ikipe ya APR FC.

Yagize ati ”iminsi yagiye ngo dukine umukino ubanza hano iwacu, intsinzi itangirira m’urugo niyo mpamvu tubitezeho ko intsinzi izaboneka kuwa Gatandatu. Mukore ibyanyu mu kibuga mutsinde byinshi nk’ubuyobozi tubafitiye byinshi tubateganyiriza ariko namwe mufite ibyo muduhishiye, iyo n’intsinzi kandi y’ibitego byinshi. Imyitozo umutoza Adil ari kubaha ni myiza kandi itanga ikizere ibindi tubiharire ikibuga ariko icyo turi gutekereza twese n’intsinzi ya hano m’urugo ndetse no mu mahanga.

Nyuma yubu butumwa umuyobozi wa APR FC Lt Gen Mubarakh Muganga yagejeje kubagize iy ‘ikipe, yifatanyije nabo mu isengesho.

Ikipe y’ingabo z’igihugu ikaba ikomeje imyiteguro yitegura imikino ya CAF Champions League aho tariki 16 ukwakira iyi kipe igomba gucakirana na etoile Du Sahel.


APR FC iri mu myitozo ikomeye yitegura Etoile du Sahel